المصير رواية تراثية ينبعاوية لبشير

مقدمة

بشير هذا مؤلف الرواية شخصية مجهولة كتب هذه الرواية على صفحات منتدى المجالس الينبعاوبة على مدار عام كامل حتى بلغت أربعين حلقة .

لم يفصح عن نفسه رغم محاولات القراء المستميتة لمعرفته فالرواية رائعة جدا و تحكي عن حقبة تاريخية من مدينة ينبع توضح العادات والتقاليد واللباس والمعاملات والهوايات والاهتمامات والحالة التي يعيشها مواطنو هذه المدينة قبل أربعين عاما .. وقد لاقت الرواية اهتمام ومتابعة جميع أهالي ينبع من يقرأ المنتديات ومن لم يقرأ وحظيت بردود وتعقيبات لم يحظ بها أي موضوع آخر فقد بلغ عدد القراءات اثنتين وخمسين ألف قراءة وعدد المتداخلين والمستفسرين والمفسرين والمعقبين أكثر من خمسمئة وأصبح اسم بشير على كل لسان  وقد تطوع كثير من المتابعين بمناقشة تفاصيل الرواية وبعضهم تعهد بشرح معاني المفردات التراثية  التي وردت فيها وبعض العادات التي مرت عليها وبعضهم اقترح تكريم الكاتب بشير باعتبار أنه وثق تراث ينبع بطريقة لم يسبقه إليها أحد

ولأهمية الرواية وانحسار الإقبال على متابعة المنتديات وخوفا من اندثار كنز تراثي ثمين كهذا فقد قمت بنسخ الرواية والاحتفاظ بها في إرشيفي مدة طويلة ممنيا النفس بأن راويها سيراجع نفسه ويفصح عن اسمه بعد كل هذه السنين وينشرها على الملأ باسمه

ولأن شيئا من ذلك لم يحدث فإنني أنشرها في مدونتي كما هي بنفس اللغة ونفس السرد والمفردات حتى يطلع عليها من فاته أمرها والفضل في ذلك لصاحبها الذي مازال مجهولا 

أحمد ظاهر ( أبو رامي )

ــــــــــــــــــــــــــــ

على مدار الزمن هى مدينة صغيره هادئه تقبع على ساحل البحر الاحمر وتعتبر جوهرته واهلها طيبين مسالمين كرماء متسامحين يعيشو كأسره واحده متماسكه فى السراء والضراء

كانت هناك اسره تعيش فى اطراف المدينه وفى ليله شديده الحراره نادت الزوجه على زوجها الفقير الذى يعمل عملا بسيطا جدا يربى به بناته الاربعه وهو منسدح فى الحوش الحقنى ابغى اولد فخبط الزوج من الفرحه مشوار طويل الى حله القاد وعاد ومعه الدايه خالتى فوز الله يرحمها رغم انو كانت الدايه ام منصور الله يرحمها اقرب لكن الزوج يشائم منها لانها كل مره تبشره ببنت وهوه نفسه فولد وحريم الحاره ماقصرو ولعو حطب وسخنو المويه واللى جابت قطعه قماش قديمه سوتها كفوله للنونو

المهم جلس الرجال فى الحوش ولف سيجاره كاظميه وسوت له بنته الكبيره فاطنه اسم دلعها فطوومه هذاك البراد اللى مافيه لا طعم ولا ريحه مويه وسكر بس ومع القلق والتوتر شرب نص البرادى وهاتك سيجاره ورا سيجاره كانه ابو .... الله يرحمه

شويتين سمعلك هذيك الصرخه ولا بنته عيشه ويدلعوها عيووشه ووراها بنته صالحه ويدلعووها صلووح ووراهم اخر العنقود بنته خديجه ويدلعوها خدووج

ابويا امى ولدت جابت ولد ونقز من الفرحه وكب نص البرادى على رجوله ولا حس والفوطه طاحت والفانوس انكسر وقام يجرى ويلف الحوش مع الفرحه كانه فى سباق تتابع 400 متر وقفز حواجز وقامو الحريم يباركوله من ورا باب القاعه مبروك يابو فاطنه جالك ولد الحمد لله على سلامه ام فاطنه

الحمد لله يارب نعمك كثيره يارب ترزقنا وتصلحهم صار الرجال يرددها الين اذن الفجر راح المسيد ( المسجد ) صلى ولما رجع فك الصنوق السيسب كان محوش فيه 13 ريال ويقدحلك خالتك فوز بريالين خلاها تغطرف ولا هذاك الصوت الزعلان من ورا الباب مبروك يابو فاطنه ولا هوه صوت خالتك الدايه ام منصور هيا خدلك مين قلها دى وايش جابها ويقدحها بريال سبحان الله الصوت اللى كان زعلان قام يفرفر

دخل عند ام فاطنه وتحمد لها السلامه وشاف الولد قالتله ايش تبغى تسميه قال ابغى اسميه ( بشير ) الله يطرح فيه البركه ويحفظه حط 5 ريال تحت مخده ام بشير وخرج على السوق يقضى اشترى سمن وعسل و3 اوقيات لحم وكراعين وبقل وفجل وجرجير وحبحبه كبيره وطول ماهو ماشى فالشارع مبروك يابو بشير يتربى فعزك البلد كلها فرحانه

ــــــــــــــــــــــــــــــــــــــ

الحلقه الثانيه
ـــــــــــــــــــــــــــــــــ

وسوو لك هذيك الغدوة اللى جمعت الحبايب والقرايب بدون عزومه الكل فرحان نفوس نقيه 3 اوقيات لحم وكم كراع كفت والحمد لله وقشر الحبحب قطعوه للغنم عشان تدر عليهم لبن وباقى الرز والخصره حطوه للدجاج عشان البيض البلدى وعندهم كمان بح 
المهم عمك ابو بشير يبغى ياخد القيلوله وحط راسه تحت السدره لكن فينك يانوم القلب يخفق من الفرحه ( طربق طربق طربق ) والفكر يودى ويجيب يخطط لمستقبل النونو بشير يبغاه يطلع مهندس كبير زى عزمت الله لا لا لا دكتور زى الملحس لالالا يسوق الطياره زى ولد جيران بنت عم اخت ولد عمى اللى فجده لالالا مدير المينا عشان اى واحد فالبنط مايرفع خشمه عليا لالالا رئيس البلديه زى العيار لالالا ابغاه يطلع زابط زى الفوال الله يرحمه ماشاء الله على المشير عامر وليه مايكون امير البلد زى السديرى 
ول ول ول اشبكم ليه لا
البنات فطوومه وعيوشه وصلوح وخدوج ومعاهم بنات الجيران كمان فرحانين وهاتك ياغلبه ولعب فالحوش اللى تلعب نقز الحبل و ( بربر ) حتى العيال يلعبو خرز وام سبع حجار وطيرى واللى يطبل فتنكه ايه نومه ولا قيوله فالكرنفال هذا 
اذن العصر لفح ابو بشير التوب على كتفه وراح المسيد صلى والناس كلهم يباركوله ونزل على الرقعه وهاتك ياسلام ومباركه المهم دحين يفكر فالسابع والعقيقه ياشيخ ربك يهونها ورزقك على الله
صلى المغرب واخد الفول وراح البيت ولا بنته خدووج سردت له الاخبار كلها ابويا النونو يصيح ابويا النونو روشوه ابويا جانا خالى سعد وجاب

سمن ابويا جانا خالى مساعد وجاب عسل ابويا خالى سعود دبح الديك ابويا جانا عمى مسعد وجاب تيس ابويا عمى سعيد اعطانى قرش ابويا جدتى هاوشتنى ابويا عيوشه قرصتنى ابويا صح النونو حقنا مافيه سنون ابويا مو انت تحبنى كتير ابويا مو صح انا حلوه
بعد العشا اتعشو وحطو راسهم ورقدو

ـــــــــــــــــــــــــــــــــــــــــــــــــ

الحلقه الثانيه
ـــــــــــــــــــــــــــــــــ

وسوو لك هذيك الغدوة اللى جمعت الحبايب والقرايب بدون عزومه الكل فرحان نفوس نقيه 3 اوقيات لحم وكم كراع كفت والحمد لله وقشر الحبحب قطعوه للغنم عشان تدر عليهم لبن وباقى الرز والخصره حطوه للدجاج عشان البيض البلدى وعندهم كمان بح 
المهم عمك ابو بشير يبغى ياخد القيلوله وحط راسه تحت السدره لكن فينك يانوم القلب يخفق من الفرحه ( طربق طربق طربق ) والفكر يودى ويجيب يخطط لمستقبل النونو بشير يبغاه يطلع مهندس كبير زى عزمت الله لا لا لا دكتور زى الملحس لالالا يسوق الطياره زى ولد جيران بنت عم اخت ولد عمى اللى فجده لالالا مدير المينا عشان اى واحد فالبنط مايرفع خشمه عليا لالالا رئيس البلديه زى العيار لالالا ابغاه يطلع زابط زى الفوال الله يرحمه ماشاء الله على المشير عامر وليه مايكون امير البلد زى السديرى 
ول ول ول اشبكم ليه لا
البنات فطوومه وعيوشه وصلوح وخدوج ومعاهم بنات الجيران كمان فرحانين وهاتك ياغلبه ولعب فالحوش اللى تلعب نقز الحبل و ( بربر ) حتى العيال يلعبو خرز وام سبع حجار وطيرى واللى يطبل فتنكه ايه نومه ولا قيوله فالكرنفال هذا 
اذن العصر لفح ابو بشير التوب على كتفه وراح المسيد صلى والناس كلهم يباركوله ونزل على الرقعه وهاتك ياسلام ومباركه المهم دحين يفكر فالسابع والعقيقه ياشيخ ربك يهونها ورزقك على الله
صلى المغرب واخد الفول وراح البيت ولا بنته خدووج سردت له الاخبار كلها ابويا النونو يصيح ابويا النونو روشوه ابويا جانا خالى سعد وجاب سمن ابويا جانا خالى مساعد وجاب عسل ابويا خالى سعود دبح الديك ابويا جانا عمى مسعد وجاب تيس ابويا عمى سعيد اعطانى قرش ابويا جدتى هاوشتنى ابويا عيوشه قرصتنى ابويا صح النونو حقنا مافيه سنون ابويا مو انت تحبنى كتير ابويا مو صح انا حلوه
بعد العشا اتعشو وحطو راسهم ورقدو

ـــــــــــــــــــــــــــــــــــــــــــــ

الحلقه الرابعه
ـــــــــــــــــــــــــــــــــ

جا يوم التلوت وكان البيت والحاره كمان زى خليه النحل بعد صلاة الفجر اللى تبخر الزير والشربه والمغاريف بالمستكه واللى تبخر القاعه واللى تكنس الحوش واللى توزع الشمع والحمص واللوز والحلاوه فصرر عشان يقسموها على الاطفال فالسابع والعقيقه وعزمو كل اهل الحاره والاقارب والمعارف والحبايب
والكل فرحان مستانس
بعد صلاه الفجر جات العربيه وفيها عم احمد ابو مجدع الطباخ ومعاه القدور ابو بشير كل همه يذبح الدمران اللى حرمو النوم وكمان عنده طليين فالزربه مربيهم على يده وكله من نعمه الله وفضله 
جابت البنت صلوووح القهوه والشاهى والمنقوش والغريبه ووراها اختها الصغيره خدووووج 
خدوووج ابويا متى تدبحو التيسه ابويا صلووح تقول انك تبغى تدبح الجفره النونو حقتى قالها ابوها لا اخصريها قالتله خدووج ابويا قول لخالتى ام منثوووول الدايه تحطلها صقرق قال لها طيب روحى هناك ابعدى 
بعد ما اتقهوو صلحو المعلاق على السدره وقام عم احمد وسن السكاكين وشربو التيس والطليان مويه وبسم الله الله اكبر ابو بشير صمم انو اول واحد يندبح التيس البطران اللى جابو اخوه مسعد الله يسعده عشان بينهم ثار الثار ماهو بين ابو بشير واخوه مسعد لا بين ابو بشير والتيس الارهابى
بزران الحاره كلهم بنات وعيال يتفرجو وفطوومه وعيوشه يتفرجو من الروشان حتى رجال الحاره مجتمعين اللى يمللى السطل مويه واللى جاب الكاز عشان يولعو الحطب واللى يفري ( الفرث ) حق الكرشه واللى يغسل تباسى الغرف واللى ينقى الرز وكل واحد يقول لابو بشير ترى المجلس عندى جاهز وعلى بقاك
الله يديم المحبه لاقصور افراح ولا قاعات البيوت كلها مفتوحه لك والقلوب اللى انرسم فيها خيالك كلها على بعض حتى العم مبروك اليمانى ( فرقنا ) اللى يبيع القماش فالبقشه اتعدى وعزموه
الضحى ضربو مرقه وعصرو عليها ليمون وبعد صلاه الظهر جوك حقين البنط والمعزومين وغرفوا وقسمو للجيران والاقارب كل واحد اخد تبسى وقسمو صدقه يارب لك الحمد اذا صفيت النيه اللقمه تكفى 101 تقولو ليه زدت واحد اقولكم يعنى اللى كفت ميه جات على الواحد ووقفت
بعد صلاه العصر جوك حريم الحاره كلهم وحريم الاقارب والمعارف وبزرانهم عشان السابع وكل حرمه جايبه الجميل اللى جايبه سروال مصري وااللى جايبه سروال خط البلده ودكه بكسر الدال واللى جايبه كرته وفيها صابون فينيك وصابونه كولاب وحق تاي كلا حسب مقدرته وفضلت خيرك يام بشير وحطولك بشير فالمنخل وولعو الشمع وقسمو على البزوره الحمص واللوز والحلاوه ياسلام هوهه ياهوهه والكعبه بنوها سيدى سافر مكه وجاب صنوق كحكه وجاتك خالتك الدايه ام منصور ودقت الهوند عند سموع بشير اسمع كلام امك ياواد ولاتسمع كلام ابوك وطاح سر بشير واخدوه ودفنوه تحت باب المدرسه عشان يحبها 
بعد الاربعين خرطت ام بشير واستمرت الحياه طبيعيه وكلها شهرين وداخل عليهم شهر الخير والبركه شهر رمضان

ـــــــــــــــــــــــــــــــــــــــــــــ

الحلقه الخامسه
ـــــــــــــــــــــــــــــــــ

دخل عليهم شهر الخير والبركه وجاب ابو بشير فضلت خيركم حب الشربه والقمر دين والططلى دحين يدلعوه يقولك كاسترد والماسيه والدقيق وقطر موز وشراب توت 
فليله من ليالى رمضان ابوبشير راح المنجاره فالليل يسهر عند البشكه ويلعب معكاره اخدله كم لسعه وحده منهم طالت خلت يده تنمل سرى وهو يتوعدهم بكره ان شاء الله اطلع الضاع وميل على بشكه الخان وصكتين ضمنه وسرى على البيت تسحرو ورقدو الصباح بناته فطوومه وصلووح وعيووشه شربو اللبن وراحو المدرسه عشان لو البنات سالوهم انتو صايمين يمدو لسانهم يطلع ابيض اول فرمضان فيه دراسه الله يرحمك ياعم مستور كلهم بناته ماعنده دلع شديد بس حنون كلهم ينادوه ابويا مستور حتى الابلات
ياسلام يارمضان ياسلام ياقلوب صافيه ونقيه العصر تشوف التباسى فوق راس البنات والعيال والرجال والحريم شبكه متداخله يبغالهم مرور لندن ينظمهم تبسى رايح البيت هذا وتبسى خارج من البيت هذا والجود من الموجود مو زى دحين مايدق جرس بابك بالشهرين بس جرس جوالك كل شوى يدق 
الله الله يارمضان انطوى طوى ودخلت عليهم العشره الاخير وجاك الشغل ياحبيبى منقوش وغريبه وفتوت عشان يقرقشوه والشيخ ابوناب والشيخ عبدالمطلوب والشيخ النبيهى وغيرهم الله يرحمهم يسوو التختيم والوداع
شهر الصيام تقضى ماعلمت به وفاتنى موسم الخيرات والنعم محمد زين وكله زين والقمر انقسم نصين اول ماكانو يعرفو ولا سمعو بالغلاف الجوى وطبقه الاوزون
لااله الا الله محمدا رسول الله
لااله الا الله محمدا رسول الله 
والمرش حق مويه الورد والقهوه الحلوه والبزوره فرحانين وعدمولك الحنابل رجولهم اعزكم الله التراب للركبه والكسف فالرقبه على شكل اعصار تسونامو 
اللى على شاشه الرادار
وجاتك الجمعه اليتيمه ووافقت يوم ليله القدر 27 البزوره يدورا على البيوت فى مجوعات منظمه كانهم عصابات المافيا ويرددو اهازيج جميله ومعاهم زنابيل سعف 
اعطونا تمره اليتامى الله يرحم والديكم ووالدين المسلمن امين
الحريم يخرجولهم فرحانين ويقسمو عليهم تمر وياويل البيت اللى ما يعطيهم مايقدرو الظروف الاقتصاديه ولا الحاله الماديه بس بطيبه قلب وشيطنه بزران 
كبريته ياكبريته ست البيت عفريته اما جواب ولا كتاب ولا نكسر هذا الباب دق دق دق طاخ طيخ بم 
وتسمع هذاك الصوت من جوه ياعيال استحوا الله يصلحكم ويشردو للبيت اللى جنبه ويعيدو الكر والفر 
ابو بشير اخدلك عقده سيجان وكنافه من الرقعه لزوم تغيير السحور 
بعد صلاه العشا وهوه مصلح البراد تحت السدره وعنده رحيمه سعد وتجيه بنته دلعوته خدووج تجرى ابويا الحق امى تصيح وحالتى الدايه ام منثوول تحط الدوا لخويا بسيل فحلقه وسمعتهم يقولو بسيل معاه ثفااااااااال قالها ايش قالت له ثفااااار زى اللى جوت البيده حقت الدزازه ونقز ابو بشير ايش ؟؟؟؟؟؟ قالو رحيمه سعد وحد الله ياغافل تقولك معاه اصفار بسيطه ياشيخ يعنى انت اول مره تخلف ماشاء على شيخ البلد عاد رد عليه ابو بشير والله يابو رحم خدووج خلعتنى وبشير هذا له حب وحدانى وحب غير قالو رحيمه ماشاء الله على جده عاد ابو بشير استشاط غضبن رغم انو الشياطين فرمضان محبوسه ومسلسله وقال فعقله خلينى العن ابو ام قبيلته هذا اللى وجهه زى الدرج وكلها يومين ويجى العيد ونتصالح بس عشان يعرف قيمتى وقيمه عيالى وكشحلك الفنجال فوجه رحيمه سعد وقالو قوم يا هم هــذا يسواك ويسوى قبيلتك وقامت الغشنه
تسحرو كنافه وحوت سيجان ورقدو

ـــــــــــــــــــــــــــــــــــــــــــــــــــــ

الحلقه السادسه
ـــــــــــــــــــــــــــــــــ

الله اكبر الله اكبر الله اكبر 
الله اكبر كبيرا والحمد لله كثيرا وسبحان الله بكرة واصيلا
وصلى الله على سيدنا محمد
ابو بشير والجيران دهنلك الديوان رخام وغسل الحنابل فالبحر وبيوت المخدات مشغولة وحط المنقوش والغريبه فالنص وجنبها قارورة الريحه والقهوه والشاهى والفتوت 
الليله عيد وعالدنيا سعيد 
وياليله العيد انستينا وجددت الامل فينا طيب ياست
البنات فطومه وعيوشه وصلوح وخدوج لبسو الكرت الجديده وممشطين شعورهم وفرحانين يالله نعيد ابو بشير نادى مرته ام بشير وقالها خلاص البنت فطومه كبرت حرام لاتخرج كدا لبسيها عبايه ومسفع واخبيها قالتله امرك وسلم الله فمك الله يخليك لينا يامستتنا ومهنينا مو زى دحين بعض الرجال لو كلم مرته تطلب الخلع راحت وجابتله النونو بشير ماشاء الله تبارك الله مروشينه ومعطرينه وقاعد الولد زى الفله بس نايم امه شربته موية غريب وانصهد 
ابو بشير جيرانه واقاربه حتى ارحامه مساعد وسعود والهــم سعد اللى تهاوش معاه اتصالحو ومعارفه كلهم عايدوه قام هوه راح كمان يعايد على الجيران وبعدين الاقارب والاهل كلهم وبعدين الاصحاب وراح حله القاد والصور والخريق والمنجاره والصعايده ورفاعه وعبس والرابغى وطلع القف 
العصر ياحبيبى وابو بشير رايح العيد ومتعدى من الزوق ولا ولدين يتضاربو ويتمردغو فالتراب ولد عيب قالو اخد قرشينى رد الثانى قاله والله حقتى فكهم ابو بشير وفك الكمر واعطى كل واحد 4 قروش صمخ وراح برحه عم مستور احسن من ديزنى لاند حمير وحصانين وعربيات ودبابات وبسكليتات
سرى وعلق بيرقه وان كانك شاطر الحقه 
سالمه ياسلامه رحنا وجينا بالسلامه
رحنا القف وجينا واكلنا حلاوه طحينا
ولبسها ثوبك 
وصناديق عم ابو يونس الله يرحمه ومدريحه الرجال والبزوره فرحانين ونفافيخ وزمامير والعاب الحبصه وقرشك بخمسه قروش والفرفيره واتوبيس سعد يوديك قهوه الدقن وعم يتيم الله يرحمه الدلوكه قايله شى و البوفيهات واشهرها بوفيه الشباب للقريشى ومحروس والسوبر ماركتات والمطاعم منتشره بطرق عشوائيه جميله ما لحقها قوقل ايرث ولا كان اتحداه يقدر يصورها ولا دفاع مدنى ولا بلديه تنكد عليك ولا دروشه فاضيه وغشنه كدابه
فصخ ابو بشير التليك حقه اعزكم الله وطلع مدريحه الرجال واخدله كم زقله الين وصل اللوح فوق بيت المقدم اللوح حق المدريحه طبعا وسرح بفكره بعيد ايييييه يابشير متى اشوفك رجال تزقل اللوح وقطع تفكيره كلمه جلللللس 
نزل ابو بشير وهوه رايح القهوه ولا ولد مدرى مين دعسته عربيه وشاله ابو بشير والناس التمت وغلسله وجهه وكبسله الجرح بن واشترى له بليله والولد قام اقوى من الحصان اللى دعسه بس يعرج قليل ولا مستشفى ولا بروزولين 
يقولك فالليل فيه مزمار وبكره طرب ابو زكى الله يرحمه
اشترى عرايص لبناته فطومه وصلوح ونفيخه لعيوشه وزميره لخدوج وعالبيت واستمر الكرنفال 6 ايام بهجه وفرحه وانس وصفاء ونقاء مع انهم فقراء والغنى الله سبحانه
وجاك عيد الحج ودبحو الخروف وقسموه جارهم ابو على صراره اول مره يحج 
هذاك اليوم بعد العصر ويسمعلك ابو بشير بنته خدوج تصرخ الدتووول وشردت اتاريه هوه مكلم السودانى يطهر بشير خلاص الولد قرب يكمل سنه واحسن تطهرو وهوه صغير ابو بشير حس قطعه من قلبه انقصت رغم انو جبار بس ماقدر يمسك بشير جاهم ؟؟ رحيمه سعد مسكه 
ماشاء الله بشير صار يحبى يدوبح وخطف الجو من الدلوعه خدوج رغم انها تحبه ودائما تسحبو من رجولو وتجرو من شعرو وتحط اصابيعها فعيونو وسموعو وخشمو وهوه يحبها ومسميها ( د )

ـــــــــــــــــــــــــــــــــــــــــــــــ

حلقه الشعبانيه
ـــــــــــــــــــــــــــــــــ

الاستاذه المشرفين لو تكرمتو تضيفو الحلقه فى مكانها المناسب ولكم الحق فى الحذف او الاضافه فى كل الروايه واشكر اخوانى محب الموروث والشاهين وجميع الاخوان على مداخلاتهم المفيده 
بدون تحديد موعد وغالبا فى الاسبوعين الاخيره من شهر شعبان يكون هناك اجتماع للاقارب والمعارف 
والجيرا ن والاصدقاء فى بيت احدهم او يتوجه بعض الاسر او الاصدقاء الى خارج البلدة كالشرم مثلا
سعديه عمه بشير عزمت العائله كلها عندها فالشعبانيه وسوت صدقه كبيره وقسمت على الفقرا والجيران رز ولحم والعصر قسمت فتوت 
الاسبوع الاخير من شعبان طلع ابو بشير مع البشكه وجهزو اغراض الشعبانيه وراحو بعد صلاه الفجر لغرف عبدالله عاشور فالشرم حتى غرف الفوال فيه بشكه ثانيه ومن يوم ما وصلو فرشوا الحنابل واللى يدبح واللى يقشر البصل واللى يفصفص الثوم بعد ماصلو العصر عمنا الاستاد القدير عبدالله ابو غمرى ومعاه ابو بشير طلعو فالدنقى وراحو قريب فالخور يبغوا المسيه وهاتك ياتجليب ماشاء الله طبولك فمجلب خمخم خيرات ويسبط السبع الخيط شويتين ولا المليح يجاوب والله يابهاره كيف الجلب صادك والتانيه والتالته والرابعه ومايمديه يتاول الوجله الا خيط ابو بشير يطنطن وبسم الله احيه يامليح جاب العقام على سموعو والتانى وبهاره ايييييه تعشت ارفع فدك ياخويا وعلى البشكه ولما جو ويلقولك الحبايب كلهم مجتمعين ويحوفولك هذيك الصياديه وغرقوها سمن برى ويقلو الحوت ويزبطو هذاك التبسى ورسلوه لاصحابهم البشكه اللى فغرف الفوال ولساع ولا هذا التبسى الصياديه اللى السمن البرى ينقط منها جايههم من بشكه الفوال ومعاه صحن سردين 
بعد العشا لعبو طرب ابو زكى وحسين محسن واليبس ومحمد سند وجمعه وراد وابو كراع الله يرحمهم والرويسى وغيرهم كثير وليله لقبل صلاه الفجر منهم اللى نزل البلد ومنهم اللى جلس ومنهم اللى رقد فوق الجلف الظهر اتغدو رز ببدنجان وحوت مقلى وبصل وقطعو هديك النمسين اللى يحبهم قلبك والحمد لله
نزلو كلهم من العايدين بعوده يارب ابو بشير راح البيت واستغرب البيت هادى ولا احد استقبله عند الباب واعطاه نشره الاخباره العالميه كالعاده ودخل البيت ويلقى لك البنات وعيوشه وصلوح وبنات الجيرا ن يلعبو طيرى وبنته الكبيره فطومه شايله اخوها النونو بشير فين امك يابنت قالتلو راحت عند الجيران جوهم حريم تتهرج معاهم فين اختك خدوج يابنت قالتلو خدوج راحت اليوم مقيله بيت عم عبدالعزيز جات خالتى عزيزه اخدتها

ـــــــــــــــــــــــــــــــــــــــــــــــــ

الحلقه السابعه 
ـــــــــــــــــــــــــــــــــ

فى يوم من الايام صلى ابو بشير العصر ونزل البلد لما تعدى من عند الكنداسه ويشوفلك العيال يجرو ويحكرو ومعاهم حجار كانهم اطفال الانتفاضه وهاتك تقديع وشاف هداك ابو يمن وزميله اللى خارجين من البنط كلهم اسبنت يجرو متجاوزين السرعه القانونيه ضعفين غير عابئين بالانظمه او القسائم والعيال وراههم بالحجار وشردو من عند الهلال جات ابو يمن الكبير حجر فالرمانه خلت سرعته زادت تبعها حركات بهلوانيه وصرخه مدويه الحقنى يا ( الى ) يعنى ينادى خويه اللى اسمه ( على ) 
رد على اهرب ياقاسم طبعا على هذا ماجالو شى عشانه سريع ويعوص زى ابو رقيع وطاحت منو علبه الزبده اللى مرسوم عليها خلاطه وانقطعت التسومه وشردو 
هاوشهم عيب ياعيال احترموه وقالو ياعم هوه ادانا 
ابو بشير راح عند اصدقائه يساعدهم بعدما نزكو الشطيه حقتهم وقلفطوها ودهن معاهم السندروس وراح على عبدالنبى الله يرحمه يبغى نشوق مالقى راح لعبدالله جابر الله يرحمه واخد قرطاس وفضاه فالعلبه 
وبعدها جاك يوم 12 ربيع وافق المولد والرقعه انقلبت فوق تحت جوك الدراويش ورصو حلاوه العرايص والحصانين والحلاوه منها الواح زى السيراميك ومنها شقف والحلاوه الحمصيه واللوز والمشبك وبسكوت خصف الجنه والسوق قاعد يغلى حركه دوؤبه وكلا يصلى على محمد صلى الله عليه وسلم ابو بشير اشترى لبناته حمص ولوز وحلاوه عرايص واشترى لبشير حلاوه حصان حجم صغير
راح البيت وجاته خدوج تجرى ابوى جبتلى حروصه قالها ايوه وفرحت واخدتها وقرمشت الحمص بس لما شافت الحصان حق بشير قلبت عليهم البيت مناحه وصياح مانى مانى ابغى حسان ابغى حسان قالها ابوها طيب خلاص قالت لها اختها عيوشه ياعيشه ولد ياعيشه ولد شويتين قليل جاهم عمها مسعد ومشترى حصان لبشير وانحلت المشكله واعطوه لخدوج لكن عينها فارغه الا تبغى اللى مع اخوها وتم تبديل الاحصنه لكنها نقاقه غيرت رايها فدقايق وتم التغيير الاخير المسموح به فى النظام الدولى للتحكيم 
وياسلام على الفرحه

ــــــــــــــــــــــــــــــــــــــــــ

الحلقه التامنه
ـــــــــــــــــــــــــــــــــ

جاك الصيف واكثر اهل البلد سندو على ينبع النخل ابو بشير يصلى الفجر فقرية العلقميه ويمر على قرية المبارك ياخد صاحبه ابو شرف ويحدرو على ينبع البحر يسترزقو الله وبعد صلاه العصر يسندو ينبع النخل مره مع ابو وصيوص الله يرحمه ومره على رجولهم 
هداك اليوم تأخرو وسندو معاهم خيرات من الله سردين وزرقان وعيش اتقاسموه وكلا على بيته ولع عودين حطب وهاتك ياشوى ورقى النخله وجنى حبتين رطب بعد العشا زبط هداك البراد ويتهرج مع بنته خدوج ابويا امى اليوم ميتت العدربه ( العقربه ) ابويا سفت السبت ( الشبت ) جنب احويا بسير ابويا ابغى اروح اتروس فالعين مع امى واحتى فتومه 
شويتين ويسمعلك صوت الزير يدرق وجاه صاحبه ابو شرف قالو قوم اهل السويق عتمو سويقه ويجوك رايحين على المقرح ابو شرف صاحبه كان احسن واحد يرقى ويحييس فالرديح ولعبو الين قبل صلاه الفجر ياسلام ايش صفا ولعب وكلام كلو حكم وصلو وعلى سوق السويق واشترو عكه عسل وعكه سمن نشيش يرتزقو الله بيها فينبع البحر بعدين راحو على قريه عين عجلان واتروشو فالعين وراحو قريه المزرعه يشتروا حشيش نجم 
يوم من الايام ابو بشير تاخر وما سند بدرى سند بعد العشاء لحالو ولما جا على قد العقده ولا هداك الهول كانو برج ايفل وبيضه مدلدل بس اكبر من البيض البلدى واعترض طريق ابو بشير قام المليح سحب السكينه يبغى يضرب الهول و قالو الهول اهب يامقسى قلبك رد عليه ابو بشير اهب ياكبر بيضوك ويغمن عليه للصبح ولا يصحيه الا صوت الجماله 
لما علم صاحبه ابو شرف بالقصه قالو ابو شرف انا مره سندت لحالى فالليل ولما تعديت بير القاضى ولا هداك الملعاب قهوونى الربع ولعبت معهم ولما صحيت الصبح مالقيت غير جرتى طلعو جن 
قالو ابو شرف تتحدانى الليله نروح جبل لولوه قالو ابو بشير خليها بكره الليله انا تعبان ولسان حالو يقول من خاف سلم رد عليه ابو شرف لا بكره انا تعبان خليها بعدين احسن ولسان حالو يقول الحمد لله جات منك
قارب الصيف على الانتهاء وعادت الطيور المهاجره لموطنها وعادت وتيره الحياه الطبيعيه

ــــــــــــــــــــــــــــــــــ

الحلقه التاسعه
ـــــــــــــــــــــــــــــــــ

مرت فتره عصيبه ساد العالم كساد وركود اقتصادى خطير ومرت فتره طويله جدا ولا بابور ( باخره ) وصلت الميناء وصارت الحاله ما يعلم بيها الا الله 
صلى ابو بشير العشا وفكر فبراد شاهى بس ياخساره الشاهى والسكر فقعر القرطاس شويتين ولا صاحبه ابو شرف ينادى اتفضل ووجب البراد ياعمى اصرف مافلجيب ياتيك مالفغيب 
قالو ابو شرف يابو فاطنه هههاى كلجت قصدى يابو بشير قالو ابو بشير عوافى يالشنكل 
رد ابو شرف طيب يالمغراف ربنا يخليهم لك اذكر الله رد ابو بشير لااله الا الله محمدا رسول الله 
قالو ابو شرف شوف ياخويا احنا اخوان واصحاب واتربينا مع بعض ولقمتنا وحده وان شاء الله مايفرقنا الا الموت صاحبى عم حماد اللى من جده وساكن فعنيكش رسلى مع دججان الله يرحمه يقول تعال جده لقيلى شغل فالمينا ومن ناحيه السكن لا تشيل هم نسكن جنب عمتى فالهنداويه 
ابو بشير مدنق وفكره يودى يمين شمال اللى يكتبه ربنا زين 
بعد ماسرا ابو شرف نادى ابو بشير حرمته وقالها انت شايفه الحال مايل يام بشير وانا ابغى اسافر جده اشتغل هناك يييييييييه قام غنج ودلع الحريم الحرمه عصبت راسها بالمنديل ولوت بوزها وقامت النياحه 
خدوج تجرى على القاعه وتقول لاخواتها الحدو امى تسيح الحقدو يابنات امى تسيح قامو فطومه وعيوشه وصلوح يصيحو ولحقتهم خدوج وصحى بشير وكمل الناقص بس ماهم عارفين على ايش 
ابو بشير وام بشير ماجاهم نوم هديك الليله البنات صاحو صاحو وانخمدو اذن الفجر اتوضا وراح الصلاه وبعدها راح على اخوه الكبير مسعد فالمقاطع قالو ابو منقوره الله يرحمه لسع ماجا هه هاداهو جا علم اخوه بالموضوع كلو قالو الله يسهل طريقك وبعدين راح قهوه شكوكو مالقى اخوه الصغير سعيد راحلو المملحه وعلمو بالموضوع قالو الله يسهلها فوجهك ياخويا يابو بشير وانا لاحقك 
انتشر الخبر بين الاهل والجيران وينبع كلها حتى البزران خدوج كل ما شافت احد تقولو هيييه ابو لايح زده هنااات بعيييد
سعد رحيمه ( ؟؟؟ ) الرمه على طول راح علم امه وقالها والله اختى ماتتغرب ولا تروح جده والله هذا رحيمك مو رجال والله دحين اروح لاختى ام بشير واحرمها لو سافرت معاه ايش يوديها جده غربه
خالتو اللى هيه حماتو ام ام بشير رسلت بنتها عزيزه لاختها ام بشير دحين حطى ملايتك على راسك وكلمى امى قالتها ام بشير دحين ابو بشير مو فيه ولا شاورته انى اخرج قولى لامى بعد العصر اجيكم وبعدين انا عندى تصبين اليوم 
قالت لها اختها عزيزه ايش عندك غدا اليوم قالت لها ام بشير عندى ويكه بايته من امس استنى اغرفلك قليل قالت لها لا ما ابغى احنا مركبين مرقه هوا 
جا ابو بشير تغدا وقالت لو خدوج ابويا قطع البحبحه اكلو والحمد لله ورقد وشاورته ام بشير انها تبغى تروح لامها قالها سلميلى على خالتى

ــــــــــــــــــــــــــــــ

الحلقه العاشره
ـــــــــــــــــــــــــــــــــ

راحت ام بشير لامها بيت اهلها قالتها امها اسمعى كلام ابو عيالك واخصريكى من اخوكى سعد لايخرب عليكى لو جوزك قالك سافرى معاى اسمعى كلامو ولا تعصيه سمعت كلام امها ام بشير قالت لزوجها كلام امها ابو بشير قال لمرته امك اصيله خليكى فبيتك مااقدر اخدكم معايا الحال متازم وبعدين لما اكون نفسى واحوش الغله يمكن اخدكم جده ووصاها على البيت والبنات وبشير ووصى اخوانه وجيرانه على بيته وودعهم
وسافر هوه وابو شرف فلورى والسواق حسن موسى الله يرحمه والمعاون عبدالفتاح ووصلولك جده ياحبيبى ونامو فقهوه عند البحر قريبه عند البنط صلوا الفجر وفطرو ويقابلولك حمدان بن مرزوق الله يرحمه ودبرلهم عمل فالبنط ودبر لهم عشه يسكنو فيها جنب البنط واشتغلو فوكالات البوابير عند حسين فايز جنب كومبانيه علوى تونسى وباعشن والعرى وبيت زينل ومشت الحال عال العال وكل واحد سوا جواب لاهله كتبهولهم ولد عمه ابو شرف اللى يدرس فمدرسه الفلاح ورسلوه مع ابو رسلان وحطو فيه عشرين ريال لما وصل الجواب البلد ضجت وكل واحد فكر يسافر جده يسترزق الله واول واحد رحيمه سعد صار كل يوم يروح عند اخته ام بشير يتلسلس ويقولها والله رحيمى ابو بشير هادا رجال والله ابو رحم قليل زيو
جيران ابو بشير والله ماقصرو انتبهو لبيت وعيال ابو بشير كانهم عيالهم
وهداك اليوم عزمهم حمدان بن مرزوق على رديح فالهنداويه زواج واحد من بيت الشطيرى وقالهم الكرنب هنا وراحو ويلقولك الينبعاويه ترش الملح ماينرش سالم عمر الحبيشى وعبدالله بن عطيه وديبان والسريحى وعبدالرحمن قاضى وحميدى باسودان ومحروس سوبيه وجميل ابو مرق بن دهيتم وجميل وزكى مقدم وعويله من ينبع وهاتك يالعب وصفا حركت عليهم المشاعر وفكرتهم بينبع وهموم الغربه وشافو واحد فالجواز اسمه محمود عارف كان فمجلس الشورى وحضر الشاب بدر كريم مذيع الملك فيصل
واحد قلهم روحو لعم محمود عارف الله يرحمه يدبرلكم شغل تراه يخدم الينبعاويه والله وما قصر ارسلهم على حمزه حبلص الله يرحمه قالهم بعد شهرين تعالو عشان اشغلكم فشركه صفا العربيه تبغى تزفلت طريق جده ينبع ويصير خير

ـــــــــــــــــــــــــــــ

الحلقه احدعش
ـــــــــــــــــــــــــــــــــ

هداك اليوم صحى ابو بشير نص الليل ويصحيلك ابو شرف قالو ابغى انزل ينبع خير ان شاء لله قالو بالى مشغول والبنات وبشير وحشونى ضحك ابو شرف وقالو قول ام بشير وحشتنى يانمس 
طيب خليك كم يوم ونسافر مع بعض حتى انا عيالى وحشونى قالو الصبح يعنى الصبح قالو ابو شرف عوافى تمت
بعد ماصلو الفجر راحو السوق كل واحد اشترى صندوق بردقان وفلاين ابو عسكرى وفوط هدايا وراحو يدورو سياره لكن هداك اليوم نحس قال ابو شرف يالله كل تاخيره وفيها خيره ابغى اخد اغراضى واروح البيت وبكره وخير ابو بشير تنكد لكنه لم يياس من رحمه الله قبل العصر ياحبيبى ويلقالك وايت القاز نازل ينبع كلمو وحط اغراضه فوق الوايت وراح يجرى عالبيت ومن الفرحه ردج الباب برجوله وطخ اغراض ابو شرف البقشه وصندوق البردقان ونسى صاحبه ابو شرف وهوه فنص الطريق وافتكره ويعود تانى مالقاه بسم الله الرحمن الرحيم فين اختفى دا راحلو بيت عمتو ماجاهم تركلو خبر انو سافر واخد اغراضه معاه ينبع ولما وصل عند الموقف ولا ابو شرف متقمبر فغماره الوايت ومولع السجاره 
هديك الايام مايعرفو وسائل السلامه ولا الارهاب وماشيه معاهم بستر الله ابو بشير قال لابو شرف فينك يالمرصاع قالو هدانى يالدمونه اركب بس 
بسم الله توكلو على الله اذن عليهم الفجر قبل مسجد المجاهدين ياسلام متشوقين لينبع كانهم غابو سنتين وهى كلها شهرين كل واحد اخد اغراضه وتوادعو وراحو بيوتهم ماشاء الله الخبر انتشر ووصل لاهلهم قبل مايوصلو بيوتهم 
لما جا ابو بشير عند بيته ويلقالك خدوج تلعب قحاف مع بنات الحاره ولما شافته صابتها هيستيريا كانها هيلوكوبتر شغلت مراوحها تبغى تقلع ماهى قادره تطير وتهبط وتدور 
سلم على خدوج وشالها واعطته موجز النشرات الاخباريه حتى حاله الطقس واسعار العملات واخبار الرياضه لفريق السرت 
ودخل البيت وسلم على ولده بشير فلذه كبدته وسلم على مرته وقسمو البردقان على الاهل والجيران كل صحن فيه 3 حبات شويتين ولا رحيمه سعد اللسلوس جاى حمد الله عالسلامه يابو رحم والله وحشتنا طيب قدر الرجال جاى من سفر ويبغى يجلس مع مرته شويه وهذا مايحس تلم ياريت يارحيمى تشوفلى شغل معاك فجده قالو يصير خير يابو رحم 
انصرفو بناته من المدرسه وسبحان الله كان قلبهم حاسس يتسابقو على البيت ولما قربو وشافو الروشان اللى فوق مفتوح بصوت واحد هييييييييييييييييه ابويا جا ابويا جا سلم عليهم وتغدو وعليهم بالخير بعد العصر ولا ابو شرف جاى عوافى يالدريجه قالو عوافى ياالكلاب وراحو القهوه وهاتك ياسلام ورده وجبا عجيب هيامه 
بعد 5 ايام رجعو جده تانى

ــــــــــــــــــــــــــــــــــــــ

الحلقه اطنعش 
ـــــــــــــــــــــــــــــــــ

وصلو جده متنكدين لمفارقه الاهل والاحباب وبعد كم يوم اتاقلمو ومشت الامور طبيعيه 
وهما فالشغل جاهم خبر وفاه عم حماد اللى فعنيكش صلو عليه العصر ودفنوه فى مقبره امنا حواء وزعل ابو شرف كثير على صاحبه وابو بشير واساه وقالو انا اخوك هذا دربنا ادعيلو بالرحمه 
ابو شرف ماجاه نوم ومعاه سعفه فيده ينكش بيها الجدر وجلس ينكش للفجر وراحو المينا اشتغل ابو بشير وناش وابو شرف كرانى 
مشت الحال عال العال والامور تمام والله ابو شرف اصيل مانسى خالتو ام حماد دايم يمر عليها هوه وابو بشير ويعطوها اللى ربنا قسمو ويشوفو طلباتها ويقضو حوايجها وهيه دايم تلتح عليهم تعالو امسكو ارض وابنو عليها عشه جنبى ياوليدى انتو تستاهلو كل خير وتونسونا ضحكو وقالولها ايش نبغى فالخبت هذا ياخاله بعيد عن المينا
بعد المغرب مزبطين البراد وجالسين فمان الله ولا هذا اللى يزهم ويدق الباب ولا هوه رحيم ابو بشير سعد المهف يوووووووووه يبغى يشتغل فجده الله يستر من المشاكل صلو العشا واتعشو ويبغو ينامو وسعد يبغى يخرج قال ايه يبغى يتفرج على جده ويسهر 
يابويا يهديك يرضيك ورانا عمل من الفجريه وخايفين عليك تضيع قالهم ياد رح اضيعكم انا قلو ابو بشير شوف يابو رحم ياغريب كون اديب واحنا جايين ناكل عيش مو نلعب هنا قالو ابو شرف خلاص اكريلك حمار وعربيه عم حماد الله يرحمه واترزق الله بيها ومنها تستفيد خالتى ام حماد قالو سعد ول على طول تبغونى اشتغل اصبرو لما اتنسم
ومن اول يوم قامت هيامت سعد وخفه عقله ويتهاوش مع السقا حتى اليمانى اللى يعلق الاتاريك فالشوارع اتهاوش معاه واتهاوش مع عيال الحاره يخرب بيته زى كلب المجمع بس ينبح وكمل الناقص ويتهاوش مع ابو شرف بس ابو شرف رجال ويقدر العيش والملح وحاط خاطر لاخوه ابو بشير ولا ياكل 10 زى سعد الهايس
ابو بشير برضه رجال ويقدر وما ينسى العيش والملح والمعروف مع اخوه ابو شرف ولا ينسى الفضل بعد الله انو هوه اللى جابو جده لكنو محتار لو طرد ولا ضرب رحيمه ينبع كلها وارحامه اللى يقدرهم مايرحموه ويلوموه وكمان حاط مقدار لام بشير اللى عاشت معاه على الحلوه والمره وتحبه وتقدره طيب كيف الحل والله بلوه ربنا بلاه بيها وصار بالو مشغول وفكره يودى ويجيب وهذا سعد لا شغل ولا مشغله اكل ومرعى وقله صنعه وحق الدكان صار يطالب ابو بشير بالدين اللى على سعد وحق القهوه كمان وابو بشير يسدد
ابو شرف عد فلوسه اللى فالصحاره لقيها ناقصه 7 ريال ضرب الجرمه وكمان ابو بشير لقى فلوسه ناقصه 3 ريال ضرب الجرمه بس قرر يشوف حل

ـــــــــــــــــــــــــــــــــ

الحلقه تلطعش
ـــــــــــــــــــــــــــــــــ

هداك اليوم وهما منهمكين فالعمل قبل الظهر جا عسكرى واخد ابو بشير قالو الزابط البخارى يبغاك وينقز ابو شرف خير ان شاء الله قالو هوه فيه غيره سعد الاجرب انا يابو شرف عمرى ماتعديت من جنب الشرطه ولا دخلتها يجى يوم هذا اللعوانه يفضحنى قالو انت تقوللى وراحو مع العسكرى ولا سعد متضارب مع ولد العمده وحابسينه بس ياحبيبى ويقعدلو ابو بشير بهداك الكف خلا سموعه تصفر ويردلو ابو شرف بالتانى خلاه زى المرصاع يرد بالتالت وكفلوه وخرج راحو البيت وجلس يبكى زى المره خلاص يارحيمى سامحنى ابو شرف قالو والله عيب ياسعد رحيمك رجال وانت فضحته قالو سعد اسكت انت يالطلوط انت اللى تسلطو عليا انت لاتتدخل بيننا صرخ ابو بشير فوجه سعد وقالو اسكت يا وبش ابو شرف رجال يسواك ويسوى ........ اعوذ بالله من الشيطان الرجيم لاحول ولا قوه الا بالله الله يهديك بس
قرر ابو بشير قرار صعب عليه وعلى ابو شرف انو يسيب البيت ويقلع معاه سعد ويسكن فبيت تانى عشان ما يسبب مشاكل لاخوه ابو شرف بس كيف يفاتحو بالموضوع والله صعبه
قام يمهد للموضوع ايش رايك يابو شرف نجيب اهالينا جده والله وحشونا والحمد لله انت شايف الحال عال العال ابو شرف فاهمو ومقدر الوضع قالو يابو بشير احنا اخوان وتربينا مع بعض وفاهمين بعض هات من الاخر يالزنبيل قالو ابو بشير طيب يالمعلفه ايش رايك قالو ابو شرف انت عارف ظروفى انا عندى جريره عيال وامى وابويا واخواتى واخوانى وخالتى وكمان عيال اختى ايتام انا اصرفهم كيف انقلهم كلهم جده والله صعبه قالو انت يابو شرف رضى والدين وربنا يكرمك ان شاء الله ويرزقك على قد نيتك 
لقى ابو بشير بيت صغير فالصحيفه كراه واخد رحيمه سعد وطلع من البيت يالله قرار صعب على ابو بشير وابو شرف بس عشان تبقى الموده لازم من التضحيه 
والحمد لله صارو متواصلين يشوفو بعض فالمينا وكل فتره يتغدو مع بعض وابو بشير يزور اخوه ابو شرف دايم ويشتكيلو من تصرفات سعد وقالو يشرب دخان ابو ورده اشوف الجبع مرميه فالحوش ومغزوزه فالجدر ولا يمللى الشربه مويه من الزير ويجى البيت نص الليل يروح يسهر فسينما جمجوم وانا رسلت جواب لاخوه خبرته قلو ابو شرف اصبر لجل عين تكرم مدينه ربنا يفرجها

ــــــــــــــــــــــــــ

الحلقه اربعطعش
ـــــــــــــــــــــــــــــــــ

ومرت الايام واستمرت معركه الكفاح فى الحياه هديك الليله ابو شرف ماجاه نوم وزى عادته يفكر وينكش فالجدر بالسعفه ويحفر فالارض فجأه ولا هداك الشى اللى يلمع فالارض يعكس ضو الفانوس نقز وجاب عود وشال الخصفه وكل مانكش اكثر صار الشى يلمع اكثرخاف ابو شرف وقال لايكون جنى وما حسب يشق النور وجاب صيخ كدا زى العتله وجلس يحفر وجاب مسحاه وحفر وحفر ولا هذا طرف قدر نحاس كبير وفتح القدر لقى فيه كردان وقلاده وجنيهات ذهب عصمللى ولا هو من صيد امس داخ وبعدين نقز وافتكر حكايه انو لازم تدبح ديك على الكنز ودقها غاره على بيت عمتو ولا سلام ولا كلام ويطخ داك ( الديك ) من العشه وجاك مطير عمتو قلتلو ولد وشبك فجعتنى اهب يالفسقان خصرها وراح يجرى ويدبح ( الديك ) فوق الكنز وخرج الكنز وصار يحفر فالبيت كلو مالقى شى تانى 
وعلى طول راح يجرى على بيت ابو بشير فالصحيفه مالقيه راحلو المينا مالقيه راح القهوه مالقيه اتارى ابو بشير يدور على سعد الداشر اللى ماجا من امس فلليل 
ابو بشير انشغل على اخوه ابو شرف راحلو البيت مالقيه راحلو بيت عمتو قالتلو والله ياوليدى الفجر جا الفسقان اخد ( دجاجه ) من العشه وعلى ماخرج يجرى بقلعتو ما شفناه 
العصر ابو شرف راح لعمتو ويعطيها جنيه ذهب وودعها غطرفت ولعبت جمباز وقالتو لو تبغى عشه الدجاج كلها والغنم اللى فالزربه خدها ياعيونى وراح لخالتو ام حماد واعطاها جنيه ذهب خلاها تصعك بهداك الموال انتو حبايب لنا واحنا حبايبكو وودعها وراح لابو بشير مالقيه برضه راح القهوه ويلقالك سعد منسدح ويشرب ككولا حاسب عنو سالو عن ابو بشير خصره سعد ما رد عليه قالو الله يهديك ياسعد خليك رجال وقول لابو بشير انى مسافر بعيد وبعدين افهمو بالموضوع 
ترك صره امانه عند اليمانى حق القهوه وقلو لاتعطيها الا لابو بشير وتفرقو الاحباب
سافر ابو شرف الخبر ومعرررط فالبقشه اللى فيها الذهب بيده وسنونه راح عند ابو رديف وداه لياسين ظليمى بعدين سافر البحرين باع الذهب هناك وصار متريش ورجع على مكه واشترى بيت كبير جنب الحرم وبيت تانى فمحبس الجن وجاب اهلو كلهم وصار يسافر بيروت ياخويا زى النقادى وتغيرت الحال وصار تاجر كبير 
اليمانى اعطى ابو بشير الصره الامانه ولما فكها بعد جهد جهيد ولا فيها جنيهين ذهب داخ ابو بشير ولما صحى ماهو فاهم القصه راح يدور ابو شرف فكل مكان مالقيه وصار محتار فامره ورغم انو متاكد من اخلاق وذمه ابو شرف لكن دس الجنيهين ولا صرفهم

ـــــــــــــــــــــــــــــــــــــــــ

الحلقه خمسطعش
ـــــــــــــــــــــــــــــــــ

الصبح راح ابو سلمى لابو بشير فالمينا قالو جا ترنك ان رحيمتك ام سعد سارت لرحمه الله ابو بشير على طول راح البيت ويلقى سعد مزبط البراد وعنده بشكه الطفره حتى اليمانى ولد السقا معاهم !!!!! وجايبين سمسميه وسعد الهامل يمول (ياعمى خدنى من ايدى) قالو الله ياخدك قوم قوم بسرعه خد البقشه نبغى نسافر ينبع امك وجعانه قالو سعد طيب سافر انت وانا اقعد هنا يمكن القى شغل غار عليه ابو بشير ونتش السمسميه من يده ورماها ولا القدح فجنب والاسلاك والمفاتيح فجنب ولد اليمانى شرد والباقيين اتسحبو واحد ورا التانى سافرو ينبع وطول الطريق وابو بشير ولا كلمه وسعد اللباب يلبلب عليهم يرويلهم حكايتو ومغامراته فجده وكيف انو اعطى واحد بونيه فوشه فى مضاربه القهوه وكيف انو وعيال الرويس ضربو عيال الكندره ورا ملعب الصبان ومره فالخاسكيه شال كيسين دخن فوق بعض ومره فباب شريف مدرى شن ومره فابحر ورا قصر الملك سعود صاد (ابو قبار ) بس ويصرخ عليه ابو بشير ياد اسكت ياد انت بالع (رادى) 
لما قربو على ينبع مع المغرب ابو بشير قلبو حن على سعد وقام يلاطفو ويبغى يبلغو خبر موت امه قالو اسمع ياسعد انت رجال امك يمكن وجعانه مرررره 
ويمكن تكون مررره وجعانه
بس انا رحيمك هذا كلو من الله والانسان المؤمن يصبر ويرضى بقضاء الله وقدره وهذا دربنا انت فاهمنى
رد عليه سعد والله يابو رحم تلقى العيال فجده دحين وحشتهم واليمانى ولد السقا وحشنى احبو يامدير
قالو ياسعد امك ماتت نحلتنى ياشيخ ولا سعد حرام قعد يصيح ويجعرررر اهىء اهىء اه ه ه يمه ياحبيتى يمه ياريتك عايشه كنى علمتك كيف ولدك سعد فجده البشكه كلهم يحبونى ومسمينى سعدان الدندون 
لما وصلو بيت سعد ولا صراخ الحريم زاد وسعد قام يسوى خراطه يجرى ويطيح ويتمردغ فالارض واخوانه والاهل والجيران عزوه ودخل سلم على اخواته قيد الزنازه دفنوها العصر 
الناس فالعزا والقارى يقرا قران وسعد لام الشباب وقاعد يحكيهم مغامراته فجده ويعلمهم كيف يولف السمسميه ابو بشير يطالع فيه ويغلى 
بعد العشا ابو بشير عزا مرته ام بشير قالتو خد البنات وروح البيت وانا شويه يجيبنى اخويا سعد قالها لا انتى باتى بيت امك وخليكى للقطوع عشان العزا وانا اخد فاطنه واخواتها وبشير والصبح اجيبهم ليكى طبعا خدوج ابوها مفشقها على كتفو وماشى بيها وهيه تعطيه نشرات مفصله للانباء طالعه لبابه لخالها سعدان ابويا الدزازه زابت تتوت اتنين ابويا عيوسه تاحت فالمدرسه ابويا بسير تلعتلو ثنون ابويا الحروف اردسنى ابويا حلاس لا تلوح زده ابويا حدنى معات ابويا خالتى عزيزه فيها نونو فبطنها وعمتى سعديه هاوستنى ان شاء الدركتن يهد بيتها 
الصبح ابو بشير راح بيت ابو شرف مالقى احد سال عنهم قالتو جارتهم ام السعد ووواااااه ياوليدى ( انقلو ) كل ابوهم مكه يابختهم جنب الحج 
بعد الخمسطعش ابو بشير يبغى يرجع جده سعد سمع من خدوج وينقز فحلق ابو بشير انا خويك يابو رحم كيف اسيبك تسافر لحالك قيد ابو بشير مفهم رحيمو مساعد كل شى قال لسعد اخوك مساعد ما هو راضى قام سعد يسبسب ويبرطم وحط حره الهدر فاختو ام بشير 
اخو ابو بشير مسعد كمان مبرطم وزعلان زمان قالو ابغى اجيك جده اشتغل
يعنى كملت لو اجتمع سعد ومسعد فجده خربوها وجعلو اهلها اذله سعد مهف ومسعد ( زغتيت ) لاضرب ضرب
ابو بشير قرر انو يسيب جده ويرجع ينبع خلاص 
سافر ابو بشير لحالو لما وصل راح للخاله ام حماد يطل عليها تصدقو ما عرف عشتها فين ويلقالك عنيكش تغيرت عشاش كثيره وارض كبيره مره مسوره بالجريد شاف الحمار مربوط عند عشه عرفها انها عشه ام حماد قالتلو اخوك ابو شرف جانى هنا وبنى العشاش هذى كلها والسور هذا كلو ليه والله يستاهل ابو شرف رجال وافى الله يسعده ماقصر معايا قال ابو بشير فعقلو اشبو ابو شرف انجن ايش يبغى فالخلا دا 
بعدين راح الهنداويه يبغى يسلم على عمت ابو شرف قالولو نقلت مكه 
ياناس ايش الهرجه

ــــــــــــــــــــــــــــــــ

الحلقه ستطعش
ـــــــــــــــــــــــــــــــــ

بعد فتره ابو بشير راح القهوه ولا اليمانى يقولو يقولك عم ابو شرف روحلو فمركاز البرحه عند بيت نصيف هوه مستنيك ضرورى هناك راح بسرعه ابو بشير ويلقالك ابو شرف راج الحلبى و(منجعص) مع كبار القوم والتجار ولما شافو نقز واخدو بعض بالاحضان وتناثرت دموع الفرح بلقاء الاحبه بعد طول فراق قالو فينك يالشعرم قالو انت فينك يالشعفل 
المهم اخدو وراحو القهوه ابو شرف قالو شوف يابو بشير حكايتى انو ربى فتحها فوشى و لقيت كنز فالبيت اللى كنا ساكنين فيه ودبحت عليه (ديك) من بيت عمتى ضحك ابو بشير قالو بس عمتك تقول انك طخيت (دجاجه) يالقفاعه قالو قوم يالصخوه المهم (باضت) لى فالقفص
ديك دجاجه هذا اللى حصل (يالمهلكه) بس لا تعلم احد وعمتى اخدتها عندى مكه وولدها رسلتو مصر يدرس هناك ودحين ابغاك تشتغل معايا واشتريلك بيت فجده ترانى محتاجك جنبى انا تجارتى توسعت وكلو من فضل الله قالو ابو بشير الله يباركلك ياخويا انت رضى وتستاهل وانا مانى قادر استحمل الغربه وابغى اعود ينبع يقولو الهدد جاى وبيتى رايح فالشارع وبناتى كبرو الحمد لله على كل حال 
قالو ابو شرف شوف يابو بشير ترا نى خاطب بنتك فاطنه لاخويا شريف وعيوشه لولدى مشرف واخطب ولدك بشير لبنتى شريفه من دحين واحنا اخوان واى شى ينقص عليك المال مالك بس قول وانا تحت امرك وابغاك تشتريلى كم بيت وكم ارض سمعت ان المتر بربع ريال فطريق الشرم عند المطار والمظلات خدلى اراضى كثيره فينبع بعدين افهمك الموضوع قالو ابو بشير ول ول انت بعقلك تشترى فالخبت قالو اشترى انت وبعدين نتافهم
وحط ابو شرف يده فالكمر وخرج 2813 ( !!؟؟ ) ريال واعطاها ابو بشير لما خلا عقلو بغى يفرط زى الزنبرك 
حاول يرفضها ( ياسلام على القناعه ) وقالو مستوره ياخويا الجنيهين الامانه اللى تركتها مع اليمانى للان فصرتها ما صرفتها الله يكتر خيرك لكن فين يروح من اصرار وعناد وقوه وحب ابو شرف وتشابكو بالايدى وطرحى ومردغه وتعررييط فبعض واليمانى حق القهو منبطح على بطنه يعلق على المصارعه ويعد 123 وفاز ابو شرف 
وقالو انت ليك عندى كثير هاذى بس كدا مشى حالك بيها دحين وللبنات وبشير (يالطقطق) قالو انقلع وانت كدا زى (الزبزوور) اخد الفلوس وتوادعو بحراره وابو بشير ماتشوف الا غباره كانو مشغل ماطور 80 حصان راح السوق وقضى هدايا واشترى( بكم) واسطواناتو والصبح راح ودع خالتو ام حماد قالتلو ترانى مسكت لك ارض كبيره جنبنا ياوليدى تعال شوفها قالها طيب طيب خليها بعدين
ولم البقشه ولم حوايجه واغراضه كلها وودع الاحباب والرفاق وتسامح من الكل رغم ان سمعتو فجده كانت زى الفل رجال حالو فحال نفسه وجالو اليمانى ولد السقا قالو امانه ياعم سلم على (سئدان )الدنون وقولو انى ما راح انساه افتكره كل ما البس (التسومه) اللى اشتراهالى قالو ابو بشير استنى خد هاذا (التليك) كمان حقه عشان تفكتره بيه لو انقطعت ( الزنوبه ) 
وسافرعلى ينبع اخد سياره (كومبليت) ياسلام عالدنيا لما تضحكلك

ـــــــــــــــــــــــــــــــــــ

الحلقه سبعطعش
ـــــــــــــــــــــــــــــــــ

لما وصل ابو بشير ينبع محمل الهدايا فرحو اهلو وجيرانو وارحامه بوصولو والكل زاره وتحمد الله على سلامتو وقسم الهدايا على الجميع ورحيمو سعد لابد عنده يبغى يشغل البكم ويكرر عليه دايما ها يابو رحم متى نعود جده انا وانت لما زهقو عيشته قام نفخ فيه قالو لاجده ولا مده خلاص ياسعد انا مانى مسافر تانى ابغى انطق هنا قالو سعد طيب كيف يارحيمى العيال هناك وحشونى وولد السقا مانى طايق فراقو قالو ابو بشير ياسعد عمك السقا مااااات وولده سافر اليمن قالو سعد سمعت انو سافر عدن وجا قالو ابو بشير انت روح بيتكم انخمد وان شاء الله ما تصحى ولو لا قدر الله صحيت نتفاهم بعدين انقلع سعد وشغل ابو بشير الاسطوانه فالبكم وجات ام بشير لابسه كرته حمرا وخلوها زهروفل ومش وجلسو سهرانين للساعه 8 زوالى لكن نغصت عليهم اصوات غريبه فالزربه حقت الغنم يالله ماعلينا
الصبح ابو بشير راح القهوه ويسمعلك السيره عن الهدد والشوارع والدركتن والتثمين ياسلام البلد مقبله على خير حتى بيته اللى فطرف البلد سمع من زمان انو رايح فالشارع طيب الحل فين يسكن وكيف يصبر على فراق جيرانو اللى هما اهله وناسه على الحلو والمره يالله اللى يكتبه ربنا نعمه وخير كثير 
راح البيت ويلقالك ام بشير معصبه راسها وتبكى خير يابنت الناس البارح كانت سهره حلوه والليله ناوين نسهر قالتلو غنمتنا ماتت وطليين وجعانين اظن بيهم ابو رمح ويجرى عالزربه وشاف منظر شى يحزن الغنم مدروخه والتيوس باركه والطليان مهطله والنعاج مهرره الدجاج ما شاء الله مافيه شى لا زكمه ولا مكمه بس مالو صوت لا يكاكى ولا يتحرك متضامن مع الغنم 
شويتين ولا سعد داخل عليهم ولما عرف القصه اخذ الغنم وعالبحر روشهم وابو بشير يدعى فسره ان العدوى تنتقل لسعد ويصاب بابو رمح لكن عمر الشقى بقى جا سعد وجاب بشبش وجرانه لبشير وخدوج وعينك ما تشوف الا النور بشير يصرخ خايف من (الدودو) وخدوج تصرخ فرحانه وام بشير تصرخ خايف انو يكسر الزير وابو بشير يصرخ على سعد والجيران يجرو ويصرخو ايش فيه ايش فيه 
بعد قليل سمعو صوت سعود اخو سعد يجرى ويضرخ ويصيح الحقنى يارحيمى اخويا مساعد طاح وقامت ام بشير تصوت اخويا اخويا و ابو بشير يجرى وسعد يجرى ويصرخ لا يكون ابو رمح صاب اخويا كمان وسعود قعد تحت الجدر يصيح قالتو اختو ام بشير خليك عند البنات الين نعود وانتبهلهم
لما وصلو بيت مساعد لقيو يده مكسوره وفيه رضه فصدره خير ان شاء الله قالهم طحت فالعنبر حق الباخره قام ابو بشير يجرى وراح لمحمد حامد الريفى الله يرحمه وجابه جبًر الكسر ووصفله البيض والرشاد وصخن المسمار وحطلو كويتين فالبطن 
ابو بشير قال لسعد تصدق اضنك وجعان شكلك اصفر وعيونك حمرا خلى الريفى يصكك وحده فرقبتك ان شاء تجيب اجلك سعد الخرنق 
شرد ورقد على الصهريج ولا جا البيت الا بعد يومين

ـــــــــــــــــــــــــــــــــــــ

الحلقه تمنطعش
ـــــــــــــــــــــــــــــــــ

الحمد لله تزبط الحال مع ابو بشير بعد الفلوس والجنيهات اللى اعطالو هيا صاحبه ابو شرف وقرر انو يشوفلو شغله يترزق الله منها اشترى ابو بشير دكان فالسوق جنب دكان ناصر عاشور الله يرحمه وقرر انو يتاجر فالمواد الغدائيه والارزاق رز ومز وسكر ومكر وسمن وممن وعسل ومسل وزيت حلو وملو وشعير ومعير وحب ومب ودخن ومخن وحلويات وملويات
وجالو اخوه مسعد وطلب انو يشغل عنده حمدان ولد عم حامد الله يرحمه يتيم وضعيف يكد على اخوانه وامه ووعدو ابو بشير خير
هداك اليوم قال ابو بشير لام بشير ابغى اسافر جده بس لا تقولى لحد زعلت المره وبرطمت وقالتو انت وعدتنى خلاص انك منت مسافر قالها ياشيخه اشبك انت انا مسافر اجيب العمره واشترى بضاعه للدكان اسبوع وراجع بسم الله الرحمن الرحيم ولا صوت سعد يقولو معاك يابو رحم قالو ياسعد خلعتنا عيب عليك ازهم ولا حمم لما تدخل البيت قام سعد يغمز وياشر لام بشير 
قالت ام بشير طلبتك يابو بشير قالها تم انتى تامرى امر ياقمر ضحكت ضحكه خليعه وتغنجت قالها هاه (اشغل البكم )غمزتلو بعينها يعنى انتبه سعد واقف قالها ايش تبغى قالتلو انك تحط سعد اخويا يشتغل معاك فالدكان وهوه احسن من الغريب قالها يصير خير قالو سعد طلبتك يارحيمى اسافر معاك نفسى اروح مكه اشوف الحج قالو ابو بشير ياسعد ياهدر هذى عمره الحج فالحج وتحت ضغط ام بشير وغنجها وتلامت سعد وافق 
راح ابو بشير وقضى حوت ناشف وبصر وصرنباق وملوخيه ناشفه وتمر ومعلفه وزنبيل ومراوح سعف وحطها فكرتون كبير ليلة السفر جاهم اخوه مسعد الزغتيت وجاب البقشه وقال انا مسافر معاك ياخويا انت زمان وعدتنى هيا خدلك كملت سعد ومسعد رايحين يخلوها خل 
سافر ابو بشير ومسعد وسعد واحرمو من رابغ وصلو جده وعلى طول كرو سياره وعلى مكه قال سعد لابو بشير ول بسرعه كدا على مكه ما شفت ولا سلمت على البشكه قام مسعد (دغن) سعد (بجمع ) قالو لاتنفخ اتكلم برواقه وقامت الغشنه فالتكسى
وصلو مكه سالو عن بيت ابو شرف دلوهم عليه عشانو صار من عليه القوم والاعيان زهمو خرج لهم الصبى ونادى عمو ابو شرف لما شاف اخوه ابو بشير تعانقو بالاحضان ورحب بيهم ترحيب منقطع النظير وحلفان الا بكره غداكم عندى ماشاء الله بيت ابو شرف كبير وفيه خدم وحشم وسلمو على ام ابو شرف وعياله وعيال اختو ماشاء الله عليهم مؤدبين ونظاف شويتين ولا الصوت اللى يقول كيف حالك ياوليدى يابو بشير ولا هيه عمت ابو شرف ويقوم ابو بشير ويسلم على يدها وعلى راسها سالتو مين هذولى اللى معاك قاللها هذا مسعد اخويا وهذا سعد ياعمه قالتو يووه هذا سعد الداشر الهامل عرفتو هذا اللى (صرقكم) فجده ابو بشير اتمنى الارض تنشق وتبلعو وابو شرف خجل قالها قومى ياعمه نامى عشان بكره اجيبلك السمسم وتسويلنا الحلاوه وتسولينا (السفا) قالت لسعد كيف حالك ياالقارح قالها بخير ياعمه عساك بخير قام مسعد مسك سعد من حلقو قالو ياصراق وفكوهم
سال ابو بشير صاحبو عن ابوه قالو مات الله يرحمه قبل شهرين عزاه واعتذر منو انو ماعنده خبر

ــــــــــــــــــــــــــــــ

الحلقه تسعطعش 
ـــــــــــــــــــــــــــــــــ

سهرو هديك الليله وهاتك ياهرجه ومرجه وذكريات وشغل ابو شرف المكيف الصحراوى سعد قالو عارفها هاذى ثلاجه قالو مسعد لا ياوبش هذى بتغاز قال ابو شرف لا هذا كنديشن حط سعد ومسعد راصهم فالروشان ونامو ومع البراد حق الكنديشن واول مره يشمو النعمه ماتسمع الا زراط سعد وشخيرمسعد ورقدو الصبح ابو بشير علم ابو شرف نيته انو ناوى يفتح دكان قام سعد نقز فالهرجه ابو شرف تضايق وزهم الصبى حقو وقالو خد عمك سعد وعمك مسعد وديهم الحرم ومشيهم فالسوق و صلو الظهر وتعالو 
ابو شرف قال لاخوه ابو بشير لاتشيل هم كل البضاعه عليا ارسلك على تاجر فجده شريكى اسمو باوارث قضى من عنده واللى تبغاه خده ولا تفكر فالفلوس واوصيك بتجاره الاقمشه وخصوصا الحريمى انا اخوك بخير واى شى ينقصك قول ولا ازعل عليك كتير السلام قالو عوافى (ياالدربكيل) قالو طيب يا (القلفاط) وقامت الحلفان والطرحى وكالعاده يفوز ابو شرف بحبه واخلاقه واخلاصه ووصاه يجيب اهله مكه وينزلو عنده والبيت اللى فمحبس الجن تحت بقاه وعنده بيوت كتيره غيرها 
ابو شرف ذبح لهم شويتين ولا اعيان مكه كلهم معزومين عم محمد بنتن وفؤاد ملائكه وزكى زمزمى والعمده محمد كلكتو وجمال خياط وصالح سندى والمطوف على فلاته وجارهم اسعد منتو والفلمبان وزكى فرموزه وابراهيم لدو وجلال يغمش وعابد خشبه الله يرحمهم والله رجال اهل مكه وهاتلك عزايم فابو بشير وحلفان ويفوز بالعشا عم كلكتو وذبح لهم ولعبو صهبه وسعد لخبطهم فالكف قام مسعد الزغتيت خجلو ولسعو بكف ومدحو الفن الينبعاوى الاصيل وعزمهم ابو بشير فينبع وحيابهم كلهم ومن يعز عليهم ووعدوه خير وابو شرف قال جاينك كلنا بعدين 
خرج سعد ومسعد برا شويتين ولا سوو مضاربه مع عيال حسن درمح وعيال علم صنجه وكسرهم مسعد الفام غير العمده اتوسط وانهى الموضوع وصالحوهم 
ابو شرف قال لابو بشير ابغى اخدك معايا الهند عندى شغل هناك اشترى بضائع ضحك وقالو خليها مره تانيه بس اسمحلنا بكره نازلين جده نقضى وعلى ينبع وهاتك ياحلفان ومردغه والمره هاذى فاز ابو بشير 
الصبح اخذ ابو شرف صاحبو للمحكمه فمكه وسوالو وكاله عامه ولما راحو البيت فك ابو شرف صندوق (السيسب) اللى جنب (الصحارا) وخرج 120 الف واعطاها ابو بشير قالو ابغاك تشتريلى كم ارض وكم بيت فينبع وركز على القف والمطار والشرم قالو بس هذا خبت وبعيد قالو بعدين تعرف والخير كتير ويمكن اجيك ينبع واشترى زياده وابغاك انت كمان ترسل لى وكاله عامه عشان ارضك اللى مسكتها لك خالتى ام حماد فعنيكش قال ابو بشير ياشيخ خليها بعدين قالو ابو شرف باللهجه المكاويه الاصيله خير البر عاجلو ياواد وانت ما ضيعك الا كلمه بعدين اهب ياينبعاويه قلبكم بلندح قالو ابو بشير ماشاء الله ياخويا خلاص صرت مكاوى رد ابو شرف والله ياخويا احب مكه واهلها لكن حب ينبع واهلها منقوش ومحفور فقلبى وتصدق انها وحشتنى ومهما رحت ومهما جيت ينبع منى وفينى مكانها وسط عينى 
توادعو وابو شرف اشترى هدايا كتيره لبنات اخوه ابو بشير ورسل سواقو يوصلهم جده فالشفر حقو ووصاه يوصلهم ينبع ابو بشير حلف بس جده

ــــــــــــــــــــــــــــــــــــ

الحلقه عشرين
ـــــــــــــــــــــــــــــــــ

وصلو جده وينقز سعد من الشفر ووراه مسعد زى القرود واختفو ابو بشير راح باب مكه لباوارث واتفق معاه يرسلو البضاعه وراح يودى لخالتو ام حماد قليل من الهديه اللى اعطى منها لابو شرف حوت ناشف ومراوح وملوخيه لما وصل عنيكش ضاع سبحان الله بيوت كتيره حيشان ودكاكين سأل لما تعب حتى وصل ولقيلك حماد سالو عن امو قالو (خرتت) وما تعرف احد دخل وسلم عليها قالها عارفانى ياخاله قالتو ايوه انت امى لا لا انت حمار ابو حماد وقامت تمول وتصيح وتناهق وتشخر ضحك ابو بشير وقاللها والله انك بركه ولما شمت ريحه الحوت الناشف صحيت وعرفت ابو بشير وقالتلو ترى ارضك موجوده وفجأه قامت تسوى زى صوت الدباب عن عن عن عاااااااان وانتفضت ورقدت غطاها ابو بشير وسلم عليها ووصى حماد انو يبر امو وينتبه لخوانو واعطاه 60 ريال 
رجع ابو بشير القهوه ويلقالك لمه وزعاق وغبار اللهم اجعلو خير وشاف 2 يمنا متمددين على الارض يفرفصو مسعد الزغتيت ضربهم وسعد سلطو اتارى واحد من اليمنا عم ولد السقا  لما شاف ولد اخوه مع سعد هاوشو وطرده بس وعينك ماتشوف الا النور لا حول ولا قوه الا بالله مالها قعده يالله مشينا على ينبع بلدك ياغريب هذا اللى قالو ابو بشير 
قام سعد يترجاه ومسعد يترضاه بس نبات ليله فجده وكأنهم قرو عليه شويه واختفو حط راسو ورقد على كرسى القهوه وهذولا انقلعو ومع التعب ما حس بنفسو الا اذان الفجر راح السجد صلى ويبغى يسافر وهذولا الطفره مالهم عينه طلب براد ابو 4 وفجأه مسعد جاى يعرج وسعد (مفقوش) فراصو وعشان حلقو قرع لما راحو العمره الفقشه قايله ياليل سالهم ابو بشير اشبكم ياعيال قالو ولا شى بس (ودينى )(اتزح لطنا) ويمكن طحنا
على طول كرا تكسى كمبليت مع سواق مايعرفوه وعلى ينبع وفالتكسى سمع الهرجه حقتهم وعرف انهم اتضاربو مع عيال حاره الشام و(رضمو) عيال السبيل وكسرو سينما جمجوم واتضاربو فالصحيفه وخربو ليله كان فيها مزمار فحاره المظلوم اهب يالبطره على اللى ياخدكم معاه مره تانيه
على (قد) النصايف ابو بشير كأنو غفا فالتكسى وراح فنومه ويسمع هرجه وغلبه وبعدين هدوء بس مع التعب ماهو دارى وفجأه صحى ويلقالك نفسو لحالو فالتكسى اتلفت يمين شمال وقدام مافيه احد طالع وراه ويشوفلك غبار بعيد ويسمع صوت الحقنى تكفى ياعم (وااااوك) نزل بسرعه ويلقالك مسعد وسعد مكتفين السواق بشماغو 
ولد ياعيال ايش فيه الله لاتباركلكم دفهم وفك السواق قالو يأدوونى من ورا ياعم وهذا مسعد الا يبغى يسوق التكسى 
اعتذر منو ابو بشير لكن السواق حلف مايتحرك شبر والتنين هذولا فالتكسى ياعمى يهديك يرضيك قام سعد يقول اخصرو خللى مسعد يسوق ترا ودينى يعرف اول كان حريف فالبسكليت حق (الفرن) ياخد اللفه وهوه مغمض بس مرتين (صقع) فالجدر 
المهم ابو بشير حاول يراضى السواق بس حتى لو يوصلهم قهوه ( السكس) وبعد محاولات مضنيه انتهت المشكله بشرط انو ابو بشير يراقب المنطقه المحايده بينهم مع نزع السلاح

ــــــــــــــــــــــــــــــــ

الحلقه 1 وعشرين
ـــــــــــــــــــــــــــــــــ

وصلو ينبع على خير وزع ابو بشير الهدايا فرحو بناته كثير واعطى ام بشير شى ما تحلم بيه هداك ( الكردان ) والحلق و5 ازواج (بناجر) وقامت المليحه تتشخلع بالذهب وفالليل شغلو البكم ووعدهم بالحج وزيارة المدينه المنوره على ساكنها افضل الصلاة والسلام 
بعد كم يوم جات (الحماليه) فيها البضايع وبسم الله حمدان ولد عم حامد نشيط نزل البضاعه لحالو والهايس سعد ما يشتغل بس يلبلب وياكل وينكش هذا ويدف هداك ويتضارب مع دا ويزعل هدوليك يخرب بيته ما خلا احد فحالو 
رصو البضاعه ماشاء الله تبارك الله الدكان ( يزغى زغى ) وقف ابو بشير وسط الدكان وكأنو ملك جالس على عرشه راج 
( الحلبى) على كتفو ومميل ( القاووقى ) وقامت التعليقات البايخه عاد ( اللى اعطاك بالقفه يعطينا بالزنبيل ) و(كنا فجرا طلعنا لبرا) و ( يعطى الحلق للى بلا سموع ) ومن اول يوم يادوب يلحق على الزباين ياسلام ياسلام طيب ياخويا سبحانك يارب ترزق من تشاء بغير حساب حتى النصارى اللى ينزلو من البواخر يجوه وسعد يخاف منهم ويطالع وراهم يشوفهم ويتاكد انهم ماهم ( نمنم) ليهم ذيل من ورا وياكلو البزران
ابو بشير التزم بقوانين السوق الشى اللى مو عنده يرسل الزبون لجيرانو ويعطيهم اللى ينقصهم ولما يشوف احد جيرانو ما (استفتح) يتعمد انو يقول للزبون طلبك تلقاه عند فلان ياسلام ياقلوب طاهره ونقيه وتقيه 
لما يأذن الظهر مايقفلو بيبان الدكاكين بس يرخو ستاره تشبه ( المخدجه ) الحمد لله الدنيا امان لا حراميه ولا صراقين رغم الفقر والحاجه ولا مشاكل ووصى حمدان انو يعطى ( سدح وابو كرم وعريوط وعبدالله خروفه ) اى شى يبغوه بدون فلوس ويقدر الناس اللى ماعندها فلوس ويقيد عليهم فالدفتر الين ربنا يفرجها 
رحيمو سعد طايح فالحلاوه طحنيه ويشرب الزيت حقها ومسوى فيها مدير بس يتنفخ ويتأمر على حمدان ويرسلو 
الحال ماشيه عال العال هداك اليوم تعدى رجال وقالو ( اهب البلد كلها تقضى من عندك ) قالو ابو بشير اهب الله اكبر عليك بس ياحبيبى ولا الرف اللى وراه فوق تحت و(اتشعتر) البكسوت و(اتكبت) الحلويات وطاح الميزان من معلاقو على رجولو ابو بشير (انخلع) وحمد ربه ورسل حمدان قسم عيش صدقه وفالليل قبل ما يشغل البكم ام بشير شربته (طاسه الخلعه)
(اخر ربوع فصفر) ام بشير سوت رز وعدس واخدت حوت ناشف وعزمت الحريم وراحو طلعه فالخبت عند العشاش 
هداك اليوم قبل المغرب جاه رحيمه سعود يجرى ويقولو كلم اختى ام بشير بسرعه تقول جوك ضيوف من مكه واحد اسمو ابو شرف ومعاه اهلو وينقز ابو بشير جرى الله يحييهم الله يحييهم

ــــــــــــــــــــــــــــــــــ

الحلقه 2 وعشرين
ـــــــــــــــــــــــــــــــــ

راح ابو بشير البيت بسرعه ويلقالك قدام البيت سيارتين وبزران الحاره ملتمين يتفرجو ويعانق اخوه ابو شرف ويسلم ياهلا ياهلا ومرحبا الله والنبى يحييكم القهوه ياولد ابو شرف معاه مرتو وعيالو وولد عمتو اللى يدرس فمصر وسواقهم سألو عن اخواتو وعن عمتو قالو مريضه وماتسيب مكه والحرم والبنات عندها بعدين يجوكم ورسلتك عمتى مويه زمزم وترى العمده كلكتو والبشكه بكره نازلين ينبع يبغو الشرم قال ابو بشير الله يحييهم لو ما شالتهم الارض نشيلهم فعيونا والله اهل مكه كرما ورجال
ورسل رحيمو سعود ينادى عمان بشير مساعد ومسعد وقال لمسعد روح بسرعه لحمدان جيب مقاضى شعريه وعيش وفول وعلبه حلاوه طحنيه وجبنه و(فتوت) 
اتقهوو وعليهم بالخير وحطوو العشا واتعشوو وهاتك ياهرجه وعلوم وذكريات وضحك ووناسه ابو شرف قال لابو بشير كيف حال عروصتنا فاطنه وغمز على ولده شرف قام ابو بشير قاللو والله بين يدك طخها بكرتتها وشرف هذا ولدى
وسعد لاصقلهم ناموو شويه وبعد صلاه الفجر قامت المصارعه الحره والحلفان ابو بشير مصمم يذبح وابو شرف نفسو فالصياديه والمطفى (الطاجن)ويفوز بيها المليح ابو شرف 
نقز ابو بشير بسرعه ولحقو ابو شرف الا يبغى يوصلو بالسياره ويروح معاه مشتاق للبحر والبلد راحو للبنقله وياخد ابو بشيربيعة فارس وبيعتين سيجان وبياضه ابو شرف قابل الساحل يهمس و يناجى النسيم العليل ويشم روائح الذكريات العطره كأنو مدمن يشم ويتنهد ويتمايل ويسلم على هذا وييآدى هداك ويشرح لعيالو ويعرفهم حوارى ينبع ووداهم بيتو القديم عيالو وولد عمتو يقولو ياي يابابا ايش هازا بيتكم قديم مررررره ويخوف نحنا مانحبوو إف ايش القرف هازا 
دنق ابو شرف على ابو بشير وهمسلو شوف الجيل هذا عيال الكلب شمو النعمه مايدرو اننا كنا جيعانين ابا عن جد 
اتصدق مره دنقت على (التفلانه) مع الشمس تصقل أحسبها هلله
قالو ابو بشير انت تقوللى اعرفك طول عمرك جيعان قالو ابو شرف طيب ياولد الشربتلى وضحكو 
ام بشير رسلت مسعد للدكان يجيب سمن بري اخد (القسط) وحطلو حمدان (اوقيتين) وطول ما هو ماشى الهبش (يكع) منها لما جابو البيت اوقيه الا ربع 
(حافت) ام بشير الصياديه واتغدو بعد الظهر على طول وراحو كلهم الشرم واتمشو وانبسطو ورجعو فالليل 
الصبح جوهم الضيوف كلهم من مكه راكبين اتوبيس ويذبحلهم ابو بشير طليين واتغدوا وعلى الشرم نزلو فغرف الفوال وجلسو يومين فالشرم كأنها من ألف ليله وليله بسط ووناسه ووفا وطيب وتمشيات وتجليب وعزم ابو بشير بشكته ولعبولهم طرب ينبعاوى سعد سوى خراطه وصقع هداك الموال اللى يقول الكلب عض الاسد رد لو مسعد موال يقول خسيس يقول للاصيل تعال عندنا خدام زعق فيهم عم كلكتو وقال ايش هازا يابويا حيوانات وخساسه قام ابو بشير خجل وسكتهم وردج هداك الموال يزورنا الغيث اذا جيتم اراضينا وابو شرف طلع بالدور جددى يانفس حظك وتانى يوم اهل مكه لعبولهم صهبه وابو بشير وابو شرف فى صراع نووى ودي على المصاريف والذبايح والمقاضى بس مين ابو بشير استخدم الفيتو وفاز

ـــــــــــــــــــــــــــــــــ

الحلقه 3 وعشرين
ـــــــــــــــــــــــــــــــــ

ابو شرف والمكاكوه راحو المدينه كم يوم عندهم شغل وراجعين 
هداك اليوم الضحى اعلن الرادى وفاة الملك فيصل الله يرحمو ابو بشير (عزل) الدكان وراح البيت زعلان مره والبلد حزنت كتير ام بشير سألتو ايش فيه علمها قعدت تصيح ولا ركبت غدا اجتمعو وجلس ابو بشير يعلمهم كيف ان الملك عبدالعزيز الله يرحمه وحد البلاد بعد شتات وتناحر ووضع لها دستور هو القران والسنه وبعدو جا ولده الملك سعود الله يرحمه وخطى على نهجه وحب شعبه وشعبه حبه قام نقز الواد بشير فالهرجه ابويا انا احبو حالى سدود تتييير اكثل من حالى سدد
قالهم ابو بشير وبعدين جا هذا الملك فيصل الله يرحمه البطل المحنك اللى العرب والمسلمين كلهم يشهدو على سياسته وبطولته ووقف فوجه الاعداء وهدد انو يقطع البترول عن الغرب وقاللهم احنا بدو ما يهمنا نعيش فالخيام ونتغذى على التمر واللبن اما انتو يا (رمم) ماتقدرو 
رجعو الضيوف من المدينه وسندو كلهم ينبع النخل وقيللو هناك واتروشو فالعين وعجبتهم و(الخارف) جنالهم رطب وقطع لهم ملوخيه و(قتُه) وجرجير وقررو يباتو بس عيال ابو شرف طفشوهم يبغو كهربا وتكييف كل شويه اف يابابا ايش هازا حر ا لعصر اتمشو وسعد يفتى ويقولهم من زمان ابوكم ورحيمى اصحاب وشركا كانو يتاجرو فالحشيش هنا !! المكاكوه استغربو وطالعو فبعض ولد عمة ابو شرف قال لسعد احترم نفسك سعد ما فهمهما وقام يبربر وقالو انت ايش تدرس فمصر قالو ادرس الحقوق القانون قالو سعد ياد قم والله ابو زكى يكرش على القانون (زبط) وصاد جراده واكلها قدامهم بغوو يطرشو ومسعد ياكل (شفُلح) وسعود لا والله قاعد عاقل 
سعد راح لاختو ام بشير وقالها ابغاكى تخطبى لى اخت ابو شرف سمعو مسعد ورطشو بكف قالو انا ابغاها فرحت ام بشير ونادت ابو بشير وقالتلو قالها (اص) ولا كلمه ولا تجيبى الطارى لاحد اخوكى سعد هذا اخطبيلو منصوره بنت الدايه ام منصور و ومسعد اخويا نبغى نخطبلو من املج الله ياخدهم التنين فضحونا 
تانى يوم حدرو ينبع وقامت مفاوضات ومناقشات بين ابو بشير واهل مكه لانهم رسلو السواق حقهم بالاوتبيس يجيب عوايلهم ويبغو يسكنو فى (الاوتيل) وابو بشير راصو والف سيف الا ينزلو عنده وعند اقاربو المهم تدخل فالموضوع ابو شرف وقال لابو بشير خليهم براحتهم وانت معانا يعنى فين حتروح 
وجابو عوايلهم كلهم ونزلوهم فالاوتيل وانبسطو وودوهم الشرم كم يوم وفرجوهم على (فرم) الملك عبدالعزيز اللى بناها 
(الطرنق)كمان ودوهم ينبع النخل وكانت تمشيات ما تنسى وشافو (الناقه) و(الوطيه)وخلال الفتره اللى قعدوها فينبع ابو بشير ما قصر سوى بياض الوجه 
واشترو اراضى كتيره وبيوت فالقف والشرم والبلد وكانت رخيصه مره ويقولو لابو بشير خذ اشترى وهوه يضحك عليهم ومستغرب منهم وكلهم راحلو المحكمه عند الشيخ القبانى اعطو ابو بشير وكالات انبسطو مررره من ينبع واهلها وكرمهم وقالو لابو بشير امانه عليك جيب اهلك واقاربك عندنا مكه ومن يعز عليك واى واحد من طرفك الله يحييه نقز سعد ومسعد وقالهم جاينكم جاينكم
وتوادعو وسافرو كلهم مكه ابو شرف قال لابو بشير يجوك ناس من المدينه بعد فتره عندهم شغل اتوصابهم قالو فعيونى

ــــــــــــــــــــــــــــــ

الحلقه 4 وعشرين
ـــــــــــــــــــــــــــــــــ

حالة ابو بشير الماديه الحمد لله صارت عال العال وصار تاجر يلعب بالفلوس لعب فالحلال وما قصر مع اخوانو ومع اقاربو وارحامو وجيرانو وكل اهل ينبع يتصدق ويزكي
اشترى بيت كبير دورين كأنو جامعه الدول العربيه ومقسوم 4 عزل عزله فيها مدرس فلسطيني اسمو ابو كفاح وعزله فيها فلسطينى مساح فالبلديه اسمو اسماعيل وعزله فيها اردنى اسمو الصوالحه مرتو دكتوره فالمستشفى وعزله فيها السودانى عصمان دكتور فالهلال واشترى بيت تانى عزلتين لسعد ومسعد
وقرر انو يزوج اخوه مسعد رغم انو اكبرهم بس ماتزوج للان وكمان بالمره يزوج سعد ويفتك منهم 
قال لام بشير واختها عزيزه واختهم فهيمه اخطبو منصوره بنت الدايه ام منصور لسعد لما سعد سمع قال لا ماهى من مقامى ولا عندها صخصيه انا ابغى اخت ابو شرف بنت نعمه وعز وتاجره ابو بشير قال انا مالي شغل لكن مرد الاقرع بياع الطواقي وما
(إلك الا منصوره ) 
اخت ام بشير الصغيره فهيمه جاتها الضحى وتلقاها وجعانه ومعصبه راصها قالتلها قومى اوديكى المستشفى قالتلها لا سويت (دوا النازل) قالتلها قومى ياشيخه انت ما عندك غير اتدهنت بفكس وغليت فلفل وحطيت ابو فاس والحلتيثه واتنشقت وشربت لبان ذكر قومى شوفى (وشك) كيف اصفر 
وافقت وراحو للدكتوره مرة الصوالحه كشفت عليها وقالتلها انتى حبلى اختها فهيمه ضحكت وقالت هذا البكم اللى شغال طول النهار والليل الدكتوره قالت شو هاظا البكم قالتها ام بشير لا ولا شى يادكتوره المضروبه هذى تمزح
وبعدين قالت فهيمه ياويلك يا بشير جاك اللى يفحسك زى الشطيطه قالتها ام بشير روحى عنى ياشيخه انت كدا والله مايجى اغلى ولا احلى من بشبش قلبى 
لما جا ابو بشير الظهر من الدكان عرف الخبر فرح كتير وحط بشير فعبو وقاللو امك تبغى تجيب لك نونو بشير قال ايوه انا اعرفو مو حلو والله افقشو فراسو واحطلو الفلفل 
البنات مررره فرحو وكل شويه خدوج تعاند بشير النونو احلى منك النونو يقعد عاقل النونو 
ياسلام ياخويا يارب لك الحمد ام بشير (حبلى) والواد بشير يبغى يدخل المدرسه بس للان امو مدلعاه وما (انفطم) من الديس وابوه وامه من الفرحه ما رقدو طول الليل مشغلين البكم وخلوها حويسه واخواتو فرحانين
صالح ولد جارهم مصلح السقا برضو فسنه اولى يروح معاه بشير وعلي ولد جارهم ابو علي وفهيم ولد خالتو فهيمه فسنه تانيه وكمان عبدالرحمن ولد خالتو عزيزه وفوزى ولد عمتو فوزيه فسنه خامسه
العصر ابو بشير اخد بشير وحلقلو (تواليته) وقيد عمتو فوزيه خيطتلو ثوب 
الصبح اجتمعو كلهم من الفرحه عمو مسعد وعمو سعيد وخاله مساعد وسعد وسعود يتفرجو على بشير وهذا الاخ قالب البيت مناحه وصياح ونفارين ما يبغى يروح المدرسه يهديك يرضيك قام عمو سعيد الحنون (وص وصو) فسموعه مدرى ايش قالو سكت بشير ومسح (زن نونه) واخدو هوه وصالح ولد جارهم السقا للمدرسه صالح ماشاء الله مايصيح

ـــــــــــــــــــــــــــــــــــ

الحلقه 5 وعشرين
ـــــــــــــــــــــــــــــــــ

جا همام العوفى ونزار لازوغلى اصحاب ابو شرف من المدينه منتدبين من وزارة المواصلات ايام وكيل الوزاره حسين منصورى لمشروع خط املج مع الشركه المتحده صفا ومعاهم جيش اهلهم واقاربهم وجيرانهم ونزلو عند ابو بشير فالبيت واكرمهم اخر كرم 
و(بلطُو) عندو اسبوعين وهاتك طلبات نفسنا فالسيجان نفسنا فالصياديه نفسنا فالكنافه نفسنا فالمعدوس والحوت الناشف نفسنا فالزرنباك ودينا البحر ودينا النخل وابو بشير وام بشير ما قصرو طلباتهم مجابه وشالوهم على كفوف الراحه حتى سافرو وبعدين صارت تجى وفود من المدينه يرسلوهم على ابو بشير والرجال يكرمهم 
سافر ابو بشير واخوانو لاملج يخطبو لمسعد وكانت السيارات لما تروح املج بصعوبه ومعروفه سيارة المحلاوى وسيارة مسعد اخو سعيد الله يرحمه كان كفر فالبحر وكفر على الساحل فمنطقة القواق وكانت املج صغيره الفوال ابو عبدالمولى قرنبيش والسوق فيه بن عاتق ولد عم عبدالكريم وقهوة المحلاوى وقبلهم محمد عبدالحفيظ الهندى قبل مبارك ابو حماره 
ورجال املج والنعم منهم عابد شاهين والفرشوطى وبيت خيايا وعبدالسلام حلواني والاستاذ ابو داوود وغيرهم كتير وعبدالله وحامد الصيدلانى سكنو فالحره وبعدين سكنو فمنطقه الان يطلق عليها حارة الصيادله الله يرحمهم جميعا
كانت املج فيها مينا وحركه وقطاير من فلسطين والسودان ومصر واليمن اهل املج رجال كرما 
سافر سعد لحالو مكه راح لابو شرف يخطب اختو ويبغى يشتغل عنده وصار سعد كل شويه يصلى قدام ابو شرف ويسبح 
اذا سبح القيطون هم بمعصية 
ويلبلب عليهم انا خلاص استقمت انا خلاص عقلت لا (كنغو) ولا منغو ولا سهر ولا صرمحه ولا رديح ولا مديح ولا عجل ولا مجل ولا طربان ولا مربان ابو شرف طالع فعمتو غمزتلو وقامت قالت 
صلى المصلي لأمر كان يطلبه 
فلما انقضى الامر لا صلى ولا صاما
سعد مو فاهم شى قاللها الله يسلم فمك ياعمه الصلاه اهم من الصيام يعنى لو الواحد تعبان كدا وجيعان ولا عطشان مايهم ياكل و يشرب بس الصلاه يقضيها بعدين وكمان الحج يعنى الواحد لازم يكون زى المسلمين لو احد اعطاه صدقه ولا زكاه ياخدها ما يهم
قاللو ابو شرف فين اخوانك وفين رحيمك انا رجال اعرف الاصول ولا اقولك تراها مخطوبه لولد فرموزه ابو شرف سكنو فالبيت اللى فمحبس (الجن) واكرمو وبالنسبه للشغل ايش تبغى تشتغل ياسعد رد عليه قاللو اشتغل تاجر كبير وابغى اصير اغنى من ابو بشير اللى رافع خشمو دا والله انت طيب يابو شرف وتراه يحش فيك ولا يبغاك رد عليه ابو شرف وقاللو اقطع واخص عيب عليك اللى مالو خير فأهلو مالو خير فالناس هذا اخويا قوم بس نروح الحرم نصلى العشا قاللو سعد انا تعبان ومصخن 
قاللو ابو شرف اسمع انا مسافر مصر بكره ومانى فاضيلك واجبك واخدته الله يهديك بس سعد فهمها ورضى بالأمر الواقع ورجع خايب الهايس وقال لاختو المتعوس يتلم على مين ؟؟ قالتلو على خايب الرجا قالها والله منصوره طيبه وبنت ناس اخطبيها بسرعه اظن صخصيتها من صخصيتى

ــــــــــــــــــــــــــــــــ

الحلقه 6 وعشرين
ـــــــــــــــــــــــــــــــــ

قرب زواج سعد ومسعد ابو بشير الله يجزيه بالخير تكفل بكل شى من الالف للياء حتى البيت من عندو
ابو بشير اعتمد على حمدان كتير فالدكان والولد امين ونشيط وذكي وفقير فكر انو يزوجه حميده بنت خالتو بالمره مع سعد ومسعد ويكسب اجرهم سمع سعد واعترض قال هذا الصبي حقك انت تحطو من مقامنا وتهين صخصيتنا وسمعتنا لا والف لا قاللو ابو بشير لما تكون دافع شي من جيبك اتكلم بعدين هذا الصبي ارجل منك واحسن منك وقامت الغشنه وصار سعد يضايق حمدان فالكبيره والصغيره لأنو صار الكل فالكل عند ابو بشير وحمدان فضح سعد انو يأخد (الغله) من الدرج قام ابو بشير طرد سعد من الدكان وفتحلو دكان بعيد يصلح بسكليتات يعنى جنزير انقطع يحطلو قفل كفر نسًم ينفخو بالطرمبه يركب دينمو للنور ويركب جرس ولا بوري يسوى تلبيسه ويدندش ويحط رقعه للكفر لو بنشر والله ابو بشير عرُف (يمرمط) مقام سعد وصخصيتو 
هداك اليوم مبسوطين ابو بشير منسدح ويلعب مع بشير حيجا ياميجا داده سعيده تاكل وتشرب وراصها قد المشرااااااااااااااااااااب وبشير (مغشغش) من الضحك وام بشير والبنات حاطين الحنا يتحنوا ومبسوطين 
بسم الله الرحمن الرحيم دخل عليهم سعد زي العفريت ووصوص اختو شويتين من جوه تنادى وتلبلب يابو بشير متى المنجد يجيب المخدات والمساند لمسعد وسعد ترى انا ابغى اسوى رفيحه وزريبى وصرر ومدح ورجيعى وتتريب وانت لازم تسوى عجل وسمسميه وطرب ورديح ودلوكه وزيد وحرابي وابغى احني بشير واخيط كرت وانصب (المنسج) لسراويل (النسله) و(الطاره) للشراشف والتفاريق والجواد والحلاوه (للنتيره) ولا تنسى تجيب الصكر للمدح والشربيت وتكلم النونو يطبخ والعويله يسوو الفازه وجيب الكراسى من الدواير وزبطو المسرح والكوشه بالسزازيد .. جمع سجاده .. وجيب الاتاريك علشان البيشانه وانا كلمت جميعه تصير عسكري
ابو بشير متعوذ من الشيطان وساكت وهيه تكرر سامعنى يابو بشير رد عليها عساكى الصنج انت واللى فبالى سامعك خلاص دوشتينى قام سعد يقول عساكى الشنز والله يارحيمى الحريم لبابين الله يعينك عليها اختى دى ام بشير لبابه لو انا مكانك كان طلقتها زمان ورميتها زى الكلبه ولا زى الحماره فالشارع ابو بشير طخو من حلقو قاللو مين الكلبه سعد جاتو (الفهيقه) قاللو قصدى الكلبه هديك اللى يخرجوا بيها المصامير قاللو والحماره قاللو السقاله حقت التلييس ابو بشير خزى ابليس وتركو وقام طلع فوق طلعت وراه ام بشير وقالت اشغل البكم قاللها لا تعدمينى بالحنا والعصر وجب قالتلو طيب لا تنسي ارسل حمدان يجيبلي ابو فروه مشتهياه قاللها انتي وحامك مره صعب دحين مو وقتو قالتلو اجل خليه يجيب كبده وفوفل والتفل والصربان وعدس ابو جبه وزيت حلو 
بعد فتره سافر ابو بشير جده وجاب علب الملكه ولوازم الجواز واشترى ذهب لأم بشير ولبناته واخواتو وللعرايص واشترى عقال مقصب ومشلح وسيف لبشير و(قصريه) جديده اكرمكم الله وجاب تلفزيون ابو دولاب وثلاجه وجات فالحماليه حقت صالح سعيد الله يرحمو اييييه من قدك ياام بشير كل الحاره تتفرج عندك على برنامج عم علي الطنطاوي الله يرحمه وبرنامج من كل بحر قطره ومسلسل المتلثم وبن الحرامي وبنت الشاويش وطلابنا فالميدان 
الحريم العواجيز لما يشوفوا المذيع يتغطون منه وكمان كل الحبايب يشربوا مويه بارده وياخدوا ثلج وارتاحوا عيالهم من مشوار مصنع الثلج فالمملحه وغثاته (عنتر)
سوو الجواز وكان كرنفال استمر اسبوع ياسلام يوم الصباحيه زار ابو بشير اخوه مسعد ورحيمه سعد وراح كمان لحمدان ويلقالك الخبل يبغى يروح الدكان ياسلام عليك ياحمدان هاوشو وقالو لا تعال بعد السابع تصدقوا رابع يوم وحمدان بيض الله ويشو متقنبر فالدكان

ـــــــــــــــــــــــــــــــــــــــ

الحلقة 7 وعشرين
ـــــــــــــــــــــــــــــــــ

بعد فتره ولدت ام بشير ولدين توأم سموهم رأفت يتلعبسوا فاسمه وينادوه (رفأت) وعبدالحميد يدلعوه ميدو ماشاء الله على ميدو منتو عاد
منصوره بنت الدايه افتكرت امها قعدت تصيح وتقول الله يرحمك يا امي قال ابو منصور فعقله الله يرحمها لو فيه كان سميناهم بشرى ونصره 
فرح ابو بشير بالتوأم وحمد ربه وشكره واشترا لهم ( هندول) وكمان فرحت مرته وبناته وبشير بالدبل نونو
هداك اليوم جا الشريف سليمان الله يرحمو جابي البلديه لابو بشير قاللو اليوم بعد العصر (خليك بالبيت) تبغاك لجنة التثمين الشيخ حامد خلاف والسيد حامد الله يرحمهم والشيخ محمود الصبحي 
المهم جات اللجنة ومتروا البيت وابو بشير زعلان انو بيته يبغى يروح فالهدد ويبعد عن جيرانوا الطيبين لكن بناته فرحانين ابويا هذا بيت قديم نبغى بيت حلو كدا كبير وما نبغى دجاج وغنم وحمام وبيض بلدي طيب اتضح ان الخارجي احسن منو ويرأسو ويتحكم فيه والخارجي يتجدد مو زى البلدي زفر ويقعد على القلب يضر ما يفيد وطبقه ارخص وما فيه كنسرول 
جا ابو شرف ومعاه اهلو وخطبوا فاطنه لاخوه مشرف وعيوشه لولده شرف ويبغوا الجواز بعد 4 اشهرقاللو ابو شرف البنات بناتك وانا مالي كلمه بعدك بس عيوشه لساعها صغيره قاللو ابو شرف ياواد اشبك انت مانك على بعضك خليك رراااجل ياواد بلا زغيره بلا هرررج حقك وان ربي احياني اخطف منك كمان صلوح وخدوج والواد بشير والحلوين رأفت وميدو قاللو ايش رأيك تأخدوا ام بشير كمان ضحكووو يالله ربنا يتمم بخير ويسعدهم
ام بشير عصبت راصها ولوت بوزها قالت ياربي بيتنا رايح فالهدد وبناتي يتغربوا عني ماني قادره اصدق قاللها ابو بشير ادعيلهم ياشيخه وعقبال الباقين ونفتك منهم ونعيش انا وانت ياجميل كدا فهدوء ورومانسيه ياطعم انت يا قشطه ضحكت وقالتلو الاسطوانات فوق (الرف) قاللها لجنة التثمين جايين خليك فالليل يا (ورور) 
كلهم سمعو بالخطبه لفحت منصوره عبايتها وجا سعد وقال انا ماني موافق على زواز البنات من اخو وولد ابو شرف هذا تراه يكرهك يارحيمي ولو تعرف ايش يقول فيك كنك طردتو وما هو من مقامنا خللي ولد فرموزه ينفعو وخرج قال (وديني محمد )دحين اقول لمسعد اخليه يوقفكم عند حدكم ومنصوره تصلط ام بشير لا تقدعي بنات فاخر الدنيا وسمعت انو بيت ابو شرف سحارين قدارين وما ينقدرو

ــــــــــــــــــــــــــــــــ

الحلقة 8 وعشرين
ـــــــــــــــــــــــــــــــــ

بعد العصر جات لجنة التثمين ومتروا البيت وقدروه بميه واتطناشر الف وسعد يقول قدامهم ياعمي مايسوى ولا تسعين 
والله معفن ويجيب الدياق (دغنه) مسعد بواحد (جمع) قالوا بس يا (سرسري) هذا البيت لمك قال سعد اه ياجنبي عن ابوك يابربري يادبا قامت اللجنه تفكك وعينك ما شوف الا الطرحي والغبار وجموع وبكوس فشلوا ابو بشير الله يكسفهم البعدا 
قام ابو بشير يدور بيت يستاجروا وينقل فيه الين ربنا يحلها واشترى ارض قالولوا الناس بعيده
جاك ابو شرف واهلوا وجابوا الهدايا وعلب الملكه اول ناس اخدوا من الهدايا سعد ومنصوره اللي قالوا اول (محنا) موافقين 
وتم الزواز ولعبوا عجل (وخلفوا لسعد) سعد خال بشير يخلف الله علييييييييييييييه عشان جاب عدلة دقيق الله يعلم من فين دبرها قامت منصوره تغطرف سعد غمزلها وقال من دقنو فتلو وهيه تغطرف وتغني فالفرح اهل مكه حمام واهل ينبع قماري واللي يماري يماري وسوت خراطه قدام حقين مكه وقسموا شربيت 
بيت ابو شرف اخدوا فاطنه وعيوشه وسافروا على مكه ام بشير فرحت لبناتها وحزنت على فراقهم وكل ما تتناسى يجوها سعد ومرتو منصوره و(تزنزن) وتنكد عليها رمتيهم يافسقانه اهب ياجباره وسعد يزيد الطين بله أي والله انك صادقه يامنصر ياعمري انت يختي على جمالك ودلالك وهذي ام بشير (تنزنز) وابو بشير (يهدهد) عليها الله يخرب مطنك ياخالي سعد اهب صدورت ابويا وامي فكل شي ناقزلهم كننا خلفناك ونسيناك
هديك الليله انكسف القمر وقام المنصوري الله يرحمه وحط الاتريك على راصو ويدق فالهوند ويدور فالحواري يهلل ويسبح مدري ولد مين قدعوا (بالمدقه) فراصو وي (فقشوا) وجا عمك العمده حمدان حداد الله يرحمه وقامت غشنه كبسوا راص المنصوري قليل بن طاب
ياسلام كانوا العمد رجال لهم تقدير ودور كبير العم زارع السيد والعم بركه خطيب والعم محمد بخيت وغيرهم الله يرحمهم
بعد كم يوم جوك حقين المدينه تاني وينزلوا عند ابو بشير بعوايلهم ول الله لا يدلهم على بيت مسلم وهاتك طلبات نبغى فصيخ نبغى ملوحه وصرنباق وبصر وحوت ميت من زمان وصياديه برادي حساوي حلا برا وبرادي مغربي خفيف وبرادي بالورد وواحد بالدوش الله يفلكلكم 
الساعه 6 فالليل بتوقيت الزوال والناس راقده ولا اصوات البواري حقت البوابير حقين المدينه انخلعوا وي ايش فيه يابويا لقيوا السما مولعه ويشوفلك زي الشهب العاب ناريه قالهم ابو بشير هذا كل سنه كرسمس النصارى اللى فالبوابير يحتفلوا قالوا حقين المدينه وي انخلعنا قالهم سعد حتى اللي يبلبعوا يقولوا خليناها كرسمس وسندوا ينبع النخل ول عليهم المداينه حتى (الدغاليب) صادوها
والله الجلسه عندكم بينبع تشرح الخاطررررر وتسرررر الررروح واكلكم مررره طعم وطبخكم كدا تحس فيه نفس حلو طيب تعالولنا المدينه انتو ما تجوو
قالولهم ان شاءالله نجيكم منصوره قالت لهم نبغى نجيكم انا وسعسع نقعد اسبوع قام ولدهم الصغير قال وي يا امي اسبوووع هذا جوزها السعلي يخوفني وياكلنا الاخضر واليابس بعدين يأكل لنا الدبيازه والبومباااااررررر

ــــــــــــــــــــــــــــــــــــــــــ

الحلقة 9 وعشرين 
ـــــــــــــــــــــــــــــــــ

جا مسعد يجري لأم بشير الحقيني نوال مرتي وجعانه بس اتطرش واتدوخ راحت ام بشير ومنصوره ودوها المستشفى ماشاء الله طلعت حبلى بس يابو الحبيب منصوره قام خبالها وغارت منها وقالت للدكتوره بلا بزرنه هذي بزره وتولد يوووه ياويلكم ترى زوزها عصبي وما يرضى شوفولكم حل 
وسعد لما سمع هاج وماج كيف مسعد (المرمطون) يولد قدامي وحمدان الصبي اللي اقل مني صخصيه مرتو حامل وانا لا وحطوا حرهم فبعض وفكل مين يعز عليهم او يكرهوه وقامت الغشنه ياناس هذا امر الله يهديكم يرضيكم لساعكم توكم عرسان ما كمتلوا سنه الله كريم يرزقكم وهذولا بسم الله الرحمن الرحيم استوحشوا وسعد السلح حالف يتجوز على منصوره وكم مره يهددها انو يتجوز عليها ام كفاح مرت المدرس الفلسطيني
بشير وصالح ولد جارهم السقا كل صباح يرحوا الحديقة بيت بابطين الحديقه يعني روضه وماشاء الله سلكوا فالدراسه ومن زملائهم حمدون وفرحون عيال قاضي البلد 
(د) حبيبة بشير اللي هيه خدووج كل عصر تذاكرلهم وتحل الواجب معاهم وعلى نغمة البياتي وبصوت عالي 
ز فتحه زا
ز كسره زي
ز ضمه زو 
ف فتحه فا 
ف كسره في 
دخلت عليهم منصوره 
ف ضمه فوووووو 
قالتلهم (تفوووو) عليكم وعلى اهاليكم يا قليلين الادب ومسكت صالح ولد السقا وفرصتو فسموعو ودفت خدوج و(قرمعت )اصابيع بشير بالمروحه ام بشير (حوقلت) وهدت عليها قالت لها مو عليكي يامنصوره قاعدين يذاكرو ردت عليها بس يختي بلا (مجق) مدرسة ايه هاذي اللي تخليهم (يت فلوا) عليا ليه انا ابليس قام بشير من بعيد يصيح ويقول لها لا انت (ام العوافي) وحرمة ابليس وخدوج قالت سلامة ابليس ومرتو عنكم وصالح ولد السقا راح قال لأمو وقامت تردح من الحوش عساها الضربه البطرانه الخبله بنت الدايه ردت منصوره انا خبله ياحماره دخل عليهم سعد وسمع (العبكه) مسك عصايا وراح طاح فالحمار حق السقا ابو صالح بعدين راح لمسعد لقيه يلعب (سرت) قالو لازم انك انا اخوك ورحيمك تطلق مرتك نوال (المهفه) سوت مشاكل فالعيله مسعد مسك (حصليه) وفقشو داخ سعد والعالم اتلمت وكان متعدي عم حامد زمعي الله يرحمه يقرأ عدادات المويه وفكهم ولملموها وشالوه على الهلال الاحمر وحطولوا (مكركون) راح المهف اشتكى الشرطه وجا العسكري عم مسند الله يرحمه ( نعنشت) وجابولك ابو بشير وصالحوهم وطلب من اخوه مسعد انو ما يضرب سعد مره تانيه وقال لسعد ابعد عن مسعد 
صار سعد كل فتره يحس بدوخه من الفقشه ويشتهي الايسكريم حق الناقرو اللي فبيت الظليمي فرح الهدر قال يمكن هاذي منصوره حامل 
ماشاء الله ولدت نوال وجابت بنت سموها نيرفين وكمان حمدان جالو ولد سماه عطيه قام سعد كل مايقابل مسعد يقوللو عوافي يابو نفرين ومسعد يشب ويولع ومنصوره تقول لنوال يا ام تفلين

ـــــــــــــــــــــــــــــ

الحلقة ثلاتين
ـــــــــــــــــــــــــــــــــ

سافر ابو بشير مع ابو شرف لمصر ولبنان وسوريا وجاب بضائع ملابس جاهزه ومناشف واحذية اعزكم الله وشنط توسعت تجارة ابو بشير وصار عنده كم محل ومخازن وصارت ام بشير تبيع فالبيت للحريم اعوذ بالله الناس ماتعطي خير وقام النق وصقعوه بعين زعروه الزعارين بعدها اللي صابو صابو الرجال طررررم ما يتكلم واتحرول ما يمشي رحيمو وصاحبو ابو شرف سمع جا على طول ويبغى ياخده مصر يعالجه هنا قامت العبكي مسعد يقول اسافر مع اخويا وسعد يقول ما اسيب رحيمي حبيبي وسافروا معاه مصر التنين 
سعد ومسعد لما طلعوا الطياره فصخوا مدسهم اعزكم الله على الباب وسلموا على المضيفين والركاب حربيه والا يبغوا يسلموا على الكابتن والا يبغوا يجلسوا قدام عشان يوصلوا بدري بس لما اقلعت الطياره انكتموا من الخوف ما تسمع حسهم الين ما وصلوا مطار القاهره ولما اهتزت الطياره فالمطبات الهوائية قامت بطونهم تقربع وقالوا ول حتى مصر (بطناج) ولما الضغط زاد فالطياره سموعهم تصفر قال سعد فينك يا مسعد ماني شايفك قاللو مسعد الحقني ياسعد حواجبي تبغى تطيح وقدموا لهم المضيفين وجبة الغدا مسعد قال لسعد لاتاخد ياد بعدين مافي (بيت الما) تتورط قاللو سعد الله ينور عليك رجال فاهم يارحيمي استقبلهم ولد عمة ابو شرف ومدير اعماله فمصر زغلول باشا 
ومسعد ضاع منهم فالمطار وسعد ضرب حمال الشنط ابو بشير منتبه لكن ما يقدر يتحرك ولا يتكلم وابو شرف منحرج بس ويلقولك مسعد فالسوق الحره يقول يبغى يشتري (دوا) واحد الله يستر عليه موصيه فيه وصلوا الشقة فداوود عدس الواد البواب خميس وابوه عم جمعه ومرتو مسعده طلعوا الشنط وشالوا ابو بشير طلعوه فالمصعد من يوم ما فتحت الشغاله ام جمالات الباب ولا سعد قام (يتمحك) فيها قاللو مسعد اقعد عاقل ياد هذي حقتي انا لقيتها قبلك صرخت فيهم الله ما تسيبوا (البتاع)
قيد زغلول باشا مقضيلهم كل طلباتهم فالشقة ابو شرف قال لمسعد وسعد ناموا بدري الصبح يجيكم زغلول وياخدكم للدكتور انا مسافر دحين لبور سعيد قام مسعد يزعق اشبو اخويا سعيد كمان تسافرلو قال ابو شرف انكتم يابغل بووووور سعيد هذي بلد عندي (صفقه) هناك قالو سعد اشرب مويه ورماد ودهن صدرك زيت زيتون زينه للصفقه 
صارو سعد ومسعد والشغاله لحالهم فالشقه وابو بشير نايم جوه قام مسعد وخرج (الدوا) وقال لام جمالات هاتي مويه بارده قالتلو لا يابيك ده بيحطوله ثلج المهم مسعد صب كاس وقال لسعد وديني لو علمت (اكتلك) هذا دوا للكرشه قالو سعد انقلع بس صب انا اعرف (العرق) من قدام وانت بزر تلعب بسروالك صب بس صب اضرب (سكالنص)
قالت الشغاله اقيب لكو مزه رد سعد لا موزه ولا بردقانه بس انت خليكي جنبي هنا ابغاكي فكلمة سر بعدين قالها مسعد هذا سعد غشيم مايعرف جيبلنا لو عندك قرص حريد ولا شويت صرنباق مزه كده نطقطق عليها قالتلو لا يابيه ده الحليب والزنتاك بطال مع الويسكي 
صب مسعد الزغتيت كاس وملاه لسعد قالت الشغاله حرام عليك يابيه دي (الكوباية) تقيب راصو الارض قال سعد انقلعي ياعنز انا اشرب المحيط واحول البحر بالفنجال على راصي ولفح الكوبايه الحمار وطررررم صار بس يطالع فيهم ولا يتنسم بعد خمس دقايق صار يقول عررررر قالو مسعد قصدك مين ياحمار قالو سعد مو عليك ياد انت انا قصدي عررران يعني كدا زي السموم فجسمي ابغى براد يعنى حلقي زي القايله قالت ام جمالات اه ه ه ه ده قصدو حررررر يعني حران يوه جاتك ايه ياسعد باشا دا انت حكايه

ــــــــــــــــــــــــــــــــــ

الحلقة 1 وتلاتين
ـــــــــــــــــــــــــــــــــ

صار سعد ومسعد ( ينبنبوا) زي التيوس واتضاربو والشغاله تصوت يالهوي الحقوني وجا البواب وابوه والبئال والمكوقي والسمكري والزبال والنشال والحرامي وفكوهم 
دخل مسعد الغرفه (مدلوخ) يبغى ينام وسعد جالس فالصاله ( يقردن) الله عيب يا سي سعد مايصحش قالها احبك يا جملتي كدا احس انك ناقتي وانا جملك و قطعتي جنزير قلبي يا فلبس انتي اتصدقي احبك اكثر من منصوره عن امها قالتلو لو زغلول باشا عرف حيئطع عيشي ياسعادة البيه شويتين وطرررش عليها وخلا الدنيا (حويسه) وصحي مسعد وضرب سعد برجلو دخلتهم الشغاله الحمام وروشتهم (فكت) شويه مسعد قال للشغاله تعرفي ام كلثوم قالتلو يانهار اسود فيه حد مايعرفش الست قالها روحي جيبيها هنا نقز سعد قاللو ياهدر جوزها محمد عبدالوهاب مايرضى يخرجها الا فالطرب وبعدين حتى لو جات انا ماجبت السمسميه معايا خليتها فالروشان 
خميس البواب قاللهم نامو دي الوئت وبكره حوديكم النيل والاهرامات والملاهي والمرسح والسيما قال سعد اتصدقوا انا اعرف(السيميا) شفت ولد يدخل من فم الجمل ويخرج من قفاه 
انخمدوا الصبح جا زغلول باشا الشغاله علمتو عن كل شي بنت (اللطلوطه) ويصحوهم وهذولا ما تسمع الا شخيرهم وزراطهم تركوهم وودوا ابو بشير للمستشفى ونوموه أذن العصر وهذولا هل رأى الحب سكارى مشخرين و(مخمجين) زيهم 
جاهم ابو شرف المغرب وصحاهم وهاوشهم وتفل عليهم قالتهم الشغاله دنا عامله ملوخيه بالانارب تاكلوا صوابعكو وراها قاللها مسعد لا انا احب اكل مع الملوخيه عيش حب غرفتلهم واتغدوا قام مسعد يغسل قاللو سعد استنى تبغى تجيب صوابعكو يعنى زي الصنبوسك يا جاهل
قالهم ابو شرف انا رايح المنصوره عندي اجتماع قالو سعد احترم نفسك انت منين لمنين تتكلم مع مرتي ولا تجتمع معاها وبعدين ياخي انا رجال ما يعيبني شي روح قولها اني ابغى اتجوز عليها ام جمالات ومسعده مرت البواب 
زعقلهم ابو شرف ياواد منك لوو ياعيال عيب استحوا الرجال فالمستشفى وجعان وانتوا تسوو كدا فضحتونا قاللو سعد رجال مين يوووووه ابو بشير اتصدق من المطار ما شفتو وحشني رحيمي قال مسعد ايوه الله يذكره بالخير اخويا ويجيبو بالسلامه 
قالوا للسواق الاصطه عبده تعال لنا شويا مشينا جاهم وهما ماشين قالهم دا ميدان التحرير قال سعد الله الحريره زينه فالبرد بصوو دي التوفيئيه قال سعد حتى احنا عندنا الاقيفه وده سور الازبكيه قال مسعد واحنا عندنا السكوبيه فينبع النخل ودي العتبه رد سعد قال تعتب على مين يللي صاحبك باعك وراحوا الملهى ومن يوم مادخلوا اخدوا الجرسونات والجمهور رده حربيه وجلسوا قدحوا كاسين وجات الرقاصه (نيرمين) وينقز عمك سعد ويربط الشماغ فنصو وهاتك ياهز ونتاير يعاند مسعد ويقولوو زي اسم بنتك قام مسعد قالوو يابويا العلم نور ومصر هاذي خالة الدنيا وتلقى الرقاصه دي ابله مو دايه زي مرتك قام سعد يصيح ومسعد ينتر ويلم بعدين مسعد ينتر وسعد يلم الله يفشلهم خالي وعمي (زروطوها) سعد يحيي مسعد ومسعد يحيي سعد واتضاربوا مع الفتوات والجرسونات والكويتيين والليبيين وشغله
مسعد اخذ الميكرفون وقال للجمهور دحين سعد يصقعكم موال وايغني وانا ادق عالدربكه سعد مسك المايك وقاللو خبيتي يامسعد
لاله يالالاله يالالاله يالاله
لاله وزمام سيدي طاح في جبت البير
لاله و(جنيه) ابو سيفين للي يجيبو
قامت الرقاصه تدور والجرسونات يدوروا والعازفين يدوروا تحت (الطربيزات) الين الفجر جاهم مدير الملهى فيه ايه انت وهوه قاللوا دول بيئولوا اللي يقيب زمام سيدهم حيعطولو جنيه واحنا تعبنا ماليئناش الزمام يابيه قاللهم المدير ولعوا اللمبات وإسألوهم هوه لونه ايه بشرط انا ليه نص الجنيه 
تاني يوم قالوا لأم جمالات ايش عندك غدا يا (بنت) قالتلهم مرقة فرخه قالها مسعد احترمي النعمة ولا تسبيها المرقه ماهي فرخه حرام كدا زعق سعد يابويا هذولا فروخ المصاريا
وداهم السواق السوق اشتروا قمصان وبنطلونات وكرفتات الالوان مشخمطه والموديلات زي وشهم وفردوا شعرهم وكووه صاروا زي القنافذ وراحو المسرح بعد ما خلص السلام الجمهوري والناس جلسوا نقز سعد على خشبة المسرح وقال لهم كسره
احنا قطعنا بحر وبرور
لجل الوفا واللزم جينا
سلام منا على الجمهور
ولراعي العرض يا خينا 
ضحك الجمهور وصفق قام مسعد يرقى بين الكراسي ويحييس ويكسر (ياليحي وياي) جوك الممثلين وكل كلمه يقولوها يردهالهم سعد ومسعد بعشره وكل حركه يطلعولهم على المسرح ولا تخلص المسرحيه الا قبل الظهر قالت لهم الشغاله هيا نلعب وافقوا قالت لسعد ودانك مثل ودان الأفه قالها سموعك قد القف قالت لمسعد (مناخيرك) اد لقمة القاضي قالهلها خشومك قد (الالقميه) قالتو راصك قد العجل قالها راصك زي النقرزان عيونك زي الصنقله
سألها سعد الفوطه فين قالتلو اهي عندك فى التواليت قالها هذا (بشكير) ياجاهله قالتلو شوفها (فالاوضه)على (الكومودينو) قال مسعد تقولك فالميضا على الكوميديا

ـــــــــــــــــــــــــــ

الحلقة 2 وتلاتين
ـــــــــــــــــــــــــــــــــ

خرج ابو بشير من المستشفى وراح الشقه الحمد لله وصارت تجي عنده ممرضة للعلاج الطبيعي والحقن اسمها نوره بس سعد شافها برج من نافوخه طار صار مايخرج من الشقه قالو مسعد قوم ياد نتمشى نبغى نروح المئطم قالو روح انت المقاطع وخلى النوره ليه
قالت لهم ام جمالات اليوم اجيب لكم(ام علي) حلاوه وحتعجبكم سعد قالها بسرعه مسعد قالو يخرب بيتك انت ماتوفر اخضر ولا يابس لما رجع مسعد علم سعد باللي شافو فالمقطم والاهرامات وشرب حمبظاظا (ليموناضه) ومقصب (قصب) سكر 
تأخرت ام جمالات سألها اتأخرتي ليه قالتلو جبتها من العجوزه ومريت عالباطنيه قالها لاتكون كبيره فالسن قالو مسعد هيا خد جبتلك عجوزه
وكيف الدكتور كشف على باطنيتك 
قالها سعد فين ام علي بس انتبهي ابو بشير لا يدري قالتلو ليه يعني اهي حيطلعها الولد البواب خرج ابو بشير من الغرفه واكل معاهم ام علي وهذولا التنين يبغوا يطقوا من القهر وسوتلهم حمام محشي (بالفريك) قال سعد ياد لا تاكل هذا (الفنيك) سم 
جاهم ابو شرف واتفق مع ابو بشير انهم خلاص يسافروا زعلوا سعد ومسعد وقالوا طيب لساع ما اتنسمنا ياناس كلها شهر اللى اخدناها هنا
رجعوا على جده وسافروا مكه جابوا العمره ونزلوا عند ابو شرف وفاطنه وعيوشه فرحوا بأبوهم بس سعد لما شاف البنات قالهم لايكون ازواجكم هذولا الرمم يضربوكم ومجوعينكم ترى نطلقكم منهم وتنزلوا معانا ينبع قالوا ابو بشير ياسعد الله لايسعدك انهد يا ثور ابو شرف حوقل والبنات خجلوا و(دنقوا) راصهم اهب يبغى يخربها المهف قال مسعد والله مايقدروا يمدوا يدهم عليهم اكسرها لهم قال ابو بشير يالله كرمك الله يابو شرف ما يبغالها الا ينبع قالوا بدري رد عليه لو جلسنا عندك ساعه يقوموها معركة شباشب الصحراء الصنادل هذولا 
سافروا ينبع وسعد الا يبغى يمر على جده عشان يعلم العيال بشكته ايش سوا فمصر رزعوا مسعد ببكس فتق جبهتو 
فرحت ام بشير ونوال ومنصوره برجعتهم والبلد كلها جات (تكفي) عن ابو بشير قيد مسعد طبع لوحه كبيره فمصر ( العين صابتني ورب العرش نجاني) وعلقها على باب اخوه من برا شويتين ولا سعد مخرج لوحة من ( البقشه) (ياناس ياشر كفاية قرررر- يازعار لا تزعرررر) ابو بشير خجل ويقولهم والله عيب هذولا اهلنا وجيراننا وناسنا اخدوها وعلقوها على بيوتهم الهدور
تاني يوم جات منصوره اتصيح الحقوني سعد يبغى يتجوز طنطا مرت البواب عليا من مصر ويقول انا (قرفه) وصخصيتي مي من مقامو
سمعوا صراخ فبيت جارهم ابو علي ايش فيه لااله الا الله انا لله وانا اليه راجعون ابو علي مات بس جابوا المغسله والنعش راح ابو بشير وقالهم الغداء عليا نقز جارهم ابو صالح السقا وقال لا والله عليا انا اولى لا انا اقرب وقامت الغشنه وطاحوا فيها الكبار اتصدقوا قاسو المسافة من باب ابو علي الله يرحمه لباب ابو بشير لقيوها لباب ابو صالح اقرب اخد الغداء ابو صالح وابو بشير ساعد ابو صالح وبعد (الوحدة) اخدهم ابو بشير وسوالهم (القطوع) جرجير وبقل وصقط وحوت للحريم اللي ماياكلوا لحمة الميت وفتوت
الناس فالناس وسعد ومسعد يحكوا عن مغامراتهم فمصر وخلوها مش مزح وصراخ وكركره اللي ما يستحوا وزيهم كثير هاذي الايام الاتحاد والهلال اوووووووو والتاني يردلو يوووووو وشايفك هاتوا بصل جيب تصليحه وعزايم ولما يحطوا (الصفر) ياناس الله يحييكم كلا يتشرد ويقول اشويه طيب لمتى 
ابو بشير اهتم بعيال ابو علي وكل مصاريفهم وكمان يصرف على عيال جاره السقا ابو صالح ويعاملهم زي عيالوا أي شي يجيبوا لبشير واخواته يجيبلهم زيو 
جات نوال اتصيح وتقول مسعد يبغى يتجوز عليا كمان قالتلها ام بشير اشبهم هذولا قالتلها نوال والله يحلم فالليل ويصرخ اللي ما يستحي ويقول ابغى ام علي (الوليه) لساعها (فالعده) ضحك ابو بشير وقالها ام علي مو جارتنا هذا حلا اكلو فمصر بس انتي سويلو (ططلي) يهجد
واحد صاحب ابو بشير قالوا فالبلدية طالبين وظائف بس قدموا لمسعد وسعد فيها وقبلوهم سعد فراش يسوي الشاهي ومراسلي ومسعد مراقب نظافه ومن اول يوم دوام اتهاوشوا مع الريس سعد يقولوو الكفتيره كبيره وانت مو كل شويه تدق جرس احنا محنا فمدرسة واتشعبط وقطع السلك ومسعد يقولوو لازم انهد الشوارع ونسويها زي مصر ولازم نبني قاعة للمصرحيات ونسوي اهرامات ولازم الملاهي الليليه الرقاصات والفرقه يجوا بدري بعد المغرب

ــــــــــــــــــــــــــــــــــــــــ

الحلقة 3 وتلاتين 
ـــــــــــــــــــــــــــــــــ

شركة الزيت العربيه ارامكو جات سوت معرض فينبع المعرض اخد اسبوع وعرضو سينما هذا الكلام يمكن قبل 45 سنه
يامطره حطي حطي على قريعه بنت اختى
بنت اختي جابت ولد سمتو عبدالصمد
قطع الله عص عوصو بالسكاكين والموسو
حطت عليهم مطره ماشاء الله خير البلد غرقت والصهاريج اتملت (سمنود عدى على الجرمي) والبيوت خررررت غير قشعوا الحمول والحنابل والخصف وحطوا قدور وسوو رز وعدس بموية المطر وصرفوا البزوره من المدرسه وهاتك يالعب فالمويه (المخوبه) يحطوا الجدع ويطلعوا فوقو
صالح (تكتو) قزازه فرجلو حطولوا عنكبوته وبشير طلعتلو (قوبه) فراصو وغاب عن المدرسه قامت امو حطت صكر ففنجان قهوه وصخنته على الجمر وكفتو على القوبه وحلقولوا اقرع عيال الحاره كل واحد يصقعو بكف على رقبته هيييييه كف الحلاقه ياد اقعد عاقل عن ابوك شبت حريقه فبيت ابوك لما طاب امو لبسته طقيه وعمامه (صمدتو) ربطتها من ورا اتحدى أي خبير فعقد الكشافه او البحر يفكها اخدو ابوه وراح المدرسه الاستاذ قالو يابشير لا تسوي (جنجنه ) قال ابوه خد لك اللحم ولينا العظم 
علي دخلو مصمار فرجلو يبغوا يودوه لدكتور البلد فالمستشفى اللي موقعها فالقاد اسمه الغوري قامت منصوره الله يزيها خير مسكتو خرجت الخشبه والمصمار من رجلو وطاحت فيه بالتسومه على مكان التكه الين خرج الدم ياعمري قام زي الفرفيره قالت لهم منصوره والله اكلم زوزي سعد ينظف لكم الشوارع عشان هوه ماشا الله مدير فالبلديه قالت لها نوال سعد قهوجي اما زوزي مسعد ياعمري مراقب قالتها حق قمايم ابو نفرين ام بشير قالتلهم بس انتي وهيه قوموا خلينا نروح لعصمانه مرت الدكتور عصمان اللي فالهلال (اسلبت) اليوم قالت منصوره يمكن شامه (مر) ضحكت نوال صرخت منصوره عشان ماعندي عيال تعانديني وطول ماهم ماشيين فالطريق زي ناكر ونكير
لما رجعوا البيت المغرب قالت منصوره لأم بشير اعطيني صكر وشاهي والله ماعندنا واعطيني قليل عدس وملوخيه وقالت نوال اعطيني (المسفع) الجديد حقك سمعتهم خدوج زهمت امها وقالت لها يمه مرت خالي ومرت عمي هذولا الشحاتين يتمعروا علينا وكل شي ياخدوه من عندنا هاوشتها امها بس يا (ماعر) لما يجي ابوكي اقولو دخل ابو بشير وسمع الهواش ايش فيه يابنت علمتوا ام بشير على خدوج زهمها وقالها انا ابوكي عيب هذولا اهلنا واحنا الحمد لله بخير يابنتي وهذا كلو من فضل الله والمال والخير هذا كلو مو حقنا هذا مال الله لازم الانسان يتصدق ويزكي ولا تجوز الا على الاقرباء والاهل اول واللي ماليه خير فأهلو ماليه خير فالناس واللي مالو اول شي اكيد مالو تالي قالتلو يابويا بس منصوره كل يوم تزعق على امي وتقولها ابو بشير شجره غره يطرح بره يودي مقاضي بيت ابو علي وابو صالح ليه قال لها يابنتي اخصروها منصوره طيبه والطيبات لله 
شاطره بنتي خدوووجه هيا كدا تعالي ( مرخي) رجولي عشان فالعطله ابغى اوديكم المدينه نزور قبر الرسول صلى الله عليه وسلم فرحت خدوج ونقزت هيييييه الله ينجحك يابويا وراحت علمت بشير وامها تغمز لها سمعت منصور لبست عبايتها وجري على سعد الحق يبغوا يروحوا المدينه فالعطله قالها والله الرمم مايعرفو يروحوا غير انا اوديهم ولا يعرفوا يسووا شي من غيري 
وراح جري على بيت رحيمو دف الباب بقوه ميدو ورفأت راقدين صحاهم المهف قال لأختو يابنت ترى لما تروحوا المدينه انا اوديكم لاتضيعوا ويصرقوكم هناك قالتو ليه انت تعرفها يعني رحت قبل كدا قالها لا بس لا تكتري بربره وهرجك لا يكثر احنا حقين البلديه نعرف اللي ما احد يعرفو ابو بشير سمعو من جوه مات على نفسو من الضحك وقال فعقلوا ابوك يا(الطويطه) بلوه وابتليناها مشاء الله على (العًًًًٍيار) عاد

ــــــــــــــــــــــــــــــــــــــ

الحلقة 4 وتلاتين
ـــــــــــــــــــــــــــــــــ

جات الاختبارات اشترى ابو بشير لولده ولصالح ولعلي برايه وتكايه ومرسام وفروخ ورق والحمد لله كلهم نجحوا وراحو سنه تانيه الا فهيم لما جاب النتيجه صاقط فتلاته مسكين كل سنه يجيب العيد الا دويره او دواير فالنتيجه منصوره تقول (زبلحه) كيف فهيم يصقطوه ويحطولو (كعك) فالنتيجه وينجحوا بعض الناس
فرحت ام بشير واشترت تلاته صناديق بيبسي رسلت واحد بيت علي وواحد بيت صالح وواحد قسمته على الجيران والاهل وسعود خال بشير نجح من معهد المعلمين اللي مديرو مهل 
ابو بشير اشترى هدايا لبيت همام العوفي وبيت نزار لازوغلي بصر وصرنباق وحوت ناشف واخذهم كلهم ومعاهم علي وصالح الفجريه سافروا المدينه فى ونيت مسوينلو حنايا ومركبين شراع سافرت معاهم منصوره ونوال مسعد قال انا ما اقدر اسافر عندي عمل بس جيبوا معاكم (شحمة ليه) من المدينه وعشان ماتعفن فالطريق حطوا عليها ملح تصبيره 
سعد سافر معاهم قالهم اوصلكم وارجع وطلع قدام بين ابو بشير والسواق وطول ماهم ماشين ( يبعبص) فالرادي واتغدوا (فطلعة الماك) وشربوا الشاهي
لما وصلوا المدينه السواق يروح يمين سعد يقولوا لا لا مو من هنا 
روح على طول لما دوخهم اظن وصلوا الحناكيه مع المغرب ام بشير دقت القزاز على ابو بشير من ورا قالتلوا تعبنا ودخنا اشبكم قال ابو بشير اشبنا 
إذا كان الغراب دليل قوم 
سيهديهم إلى جيف الكلاب
استاجر ابو بشير بيت كبير جنب الحرم راحوا الحرم سألوا عن (المزور) الشيخ علي بخيت ابو مايله الله يرحمو زورهم ومسك فيهم وعزمهم راحوا اتغدوا عنده
رفأت وميدو يخافوا من ( الاغوات) وبشير وصالح وعلي اخذوا كل واحد (دورق) من الحرم ويجروا ورا الحمام فالحصوة وبعد كم يوم قال ابو بشير لأم بشير عيب ياشيخه يالله نروح نسلم على بيت همام ونزار وراحوا لهم فقربان لما جو دقوا الباب خرج همام واخذ الهديه دخلها جوه وخرج تاني قالهم احنا معزومين انتو متى جيتو ومتى مسافرين طيب خلينا نشوفكم حتى اتفضلوا ما قال لهم ابو بشير (انبخ) قام سعد قالوا ميعادك لما تجي ينبع ( يالسلوس) 
وراحو على السيح بيت نزار لقيوا ولده يلعب قدام الباب لما شافهم شرد على جوه ويصرخ وي وي وي الحقيني ياماما سعد اللي يأكــل ( الشبشب) جا بس منصوره ياثوب مين شقك قالتلو شبشب ياولد التلاليلك شبشب فعينك يا مارد قالتلها ام بشير قصده (بشبش) يا شيخه
انصك الباب بقوه فوجههم (طل) الولد عليهم من الشباك قاللو سعد ابوك فين قال الولد يقولك بابا هوه ماهو موجود قالوا طيب امك قال الولد حتى ماما قالتلي قلهم نايمه قالت منصوره عساها (المرقده)
ابو بشير (كرتن) قال للولد خذ هذا الزنبيل الولد زي الفرفيره خرج طخوا وشرد على جوه سعد قال ان شاء الله ينشب فحلق امك وابوك يالساليس رد عليه الولد لا تسب انتوا ياحقون السمك يازفيرين وي معفنين سعد مسك حجر (وردجها) فالشباك وقالهم عن ابوكم يا فسافيس
انبسطوا فالمدينه يصلوا فالحرم والحريم يقضوا من شارع العينيه ابو بشير قال لسعد خلاص انزل انت ينبع عشان عملك 
هذاك اليوم ابو بشير (فالحقله) ويقابل نزار تصدقوا عينه فعينه ما سلم حتى شويتين ( زبق ) واختفى
انبسطوا فالمدينه ماشاء الله اخذوا شهر ولما جوك نازلين محملين هدايا مكانس وشراب وزيار وصربان و(حلي يه)

ــــــــــــــــــــــــــــــــــــــ

الحلقة 5 وتلاتين
ـــــــــــــــــــــــــــــــــ

اخذوا اسبوعين فينبع وقالت ام بشير والله البنات وحشوني ونفسنا زي ما زرنا النبي صلي الله عليه وسلم نروح نجيب عمره ونشوف الكعبة ونشرب من زمزم قال ابو بشير بس كدا غاليه والطلب رخيص يا حبي الاول والأخير ضحكت بغنج وقالت يخليك لينا يا سبعي غمزلها وغمزتلو وطلعوا فوق وقعوا الاتفاقية للحوار والمطارحه والمصارحة الدولي 
قالتلو حرام ابغى اخذ البنات نوال ومنصوره معايا وكمان علي يتيم وصالح فقير قالها اللي تشوفيه بس ربنا يفكنا من بلاوي سعد ومسعد ان شاء ما يجوا معانا وما يعطوهم اجازه قالت ايش نسوي عاد على فكره يابو بشير ترى ماشاء الله ولدك عبدالحميد (ميدو) طالع شقي مره وعصبي غير عن رفأت حتى لما يرضع يجر الديس جر(ويعرط) فيه 
ولا يحترم احد يقول لخالو سعد ياأدس ضحك وقالها هذا اختصار كدايس اديداس
سعد ومسعد دخلوا للريس يقدموا اجازه قال الريس كترتوها ياسعد ياولدي اكلمك بصدق شعور قال سعد شعور ولا سيجان كخخخخخخخ
المهم سافروا كلهم مكه احرموا من رابغ وطول الطريق وبشير كل ما شاف جمال ولا غنم يزعق ويقول عمي جمل خالي تيس منصوره ( بخت ) فيه فجعتو قالتلها نوال حرام عليكي قصدوياخالي شوف التيس قالتلها 
(اصم الله) كدا بلا مجغ 
وصلوا مكه سألوا عن بيت ابو شرف قالوا لهم نقلوا فالقشاشيه قال سعد هيا خذلك من القشله لمدري شن دلوهم على البيت وتعال شوف الترحيب من ابو شرف واهلو والبنات فطومه وعيوشه مرررره فرحوا بيهم ارتاحوا شويه وعلى الحرم طافوا وسعوا وملوا (الدلو) زمزم شربوا وروشوا البزران وحلوا احرامهم اخذهم ابو شرف وراهم العماره حقتوا فالجراديه ماشاء الله 9 طبق
راحوا البيت واتعشوا وعليهم بالخير سعد اشر لمسعد وقاموا يسووا (فراخه) و(اتسحلبوا) وخرجوا ابو بشير قالهم فين رايحين قالوا (سويعه) ونجي قال الله يستر اتاريهم الهبوش يدوروا عيال حسن درمح وعلم صنجه اللي اتضاربوا معاهم اول يبغوا (يرضموهم) بس الحمد لله مالقيوهم
سمعوا المكاكوه اصحاب ابو شرف انو ابو بشير هنا وتعال شوف عزايم وحلفان وانس وكرم زايد عن حدو 
اخذهم ابو شرف وراحوا الطايف فمزرعته من يوم ما وصلوا سعد صار لونه ازرق ويكح وما يتكلم و(يزاحر) اتاريه (الغاتمه) اكل البرشومي بقشره وعلى المستشفى حطولو (طرنبه) قالهم ايش دراني انا احسبه شفلح الطايف اكبار
وانبسطوا فالطايف ورجعوا مكه قال ابو شرف بكره ترانا معزومين فوادي فاطمه قالت منصوره يا بختك يا بنت عمك اشترالك وادي طيب ليش مااشتريت واحد لعيشه

ــــــــــــــــــــــــــــــــــــ

الحلقة 6 وتلاتين
ـــــــــــــــــــــــــــــــــ

راحوا وادي فاطمه عند اصحاب ابو شرف واكرموهم وطلعوهم مزرعه كبيره فيها بير وبركه وقاموا يبطبطوا البزران والحريم فالمويه وبعد العشا جابوا سيرة ينبع والكسرات وطلبوا منهم محاوره حية على الهواء اعتذر ابو بشير وابو شرف بلباقة وقالوا كلام حكم مقول للكرنب وابو مدهون والقريشي وابو مازن الله يرحمهم قام سعد يقول يالله انا ومسعد نلعبلكم ترانا شعار كبار وايش البزرن اللي طالعين اليومين هاذي قال مسعد ايوه ياخويا هيا ناخد لحم مدري لخم
ابو شرف وابو بشير زعلوا وحاولوا يغيروا الموضوع ويأشروا لهم وهاذولي ولا كنك هنا وحقين وادي فاطنه يرموا تفلانه الدلال بينهم ويحرشوهم على بعض اللي نقز يسوي الشاهي واللي جاب متاكي واللي يقول بصوت مسموع والله انت شاعر كبير هيا اسمعوا الكلام من اهلو دحين ورصوا كم راص حجر جراك وجابوا الشييش 
سعد
انا فرسم المثل دندون 
اما انت ملقوف صفيره
ماهمني لو يجوا مليون 
اجعلك لعبه وفرفيره
ضجت الجلسه تشجيع وضحك وشماته وانقسام اراء وتحليل ومبارزة ثقافية وفجاه سمع هس
مسعد
ماهمني الجاهل المجنون 
فكرو وحياتو فدحديره 
لساع ما مسح الزنون
بزران خلوه زميره
ضجت الجلسه تشجيع وضحك وشماته وانقسام اراء وتحليل ومبارزة ثقافية وفجاه قام سعد وكشح مسعد بتراب وقلو ينعن ابوك يابو نفرين وقام مسعد اخذ عود حطب ويجري وراه ولفوا المزرعه 4 مرات ودخل سعد عند الحريم يصرخ ويصيح وحقين الوادي ميتين من الضحك والوناسه والبسط وصار لغم ماهو لحن ولا لحم ولا لخم
ابو شرف وابو بشير استأذنوا قالولهم ياجماعه ما يسير بدري اتغدوا بكره وسافروا كيف تمشون بالليل بس هاذولي صمموا يالله كرمكم الله 
سعد غير لبسوه عبايه ودسوه بين الحريم والبرزران عن مسعد الزغتيت بس يا حبيبي وطول ماهم ماشين فالطريق وابو بشير وابو شرف يهزؤوهم ياعيال انتوا ما تستحوا ولا تكلوا ولا تفكروا تخلوا الاجانب يتفرجوا فيكم ويحرشوكم على بعض هيا ايش كسبتوا غير الزرا ياعيال الكسرات ماهي هداره وفرض عضلات الكسرات فن وثقافه وعلم وادب واحترام وصفا وانس لا تخلوا الغريب يشمت فيكم ويتتريق عليكم ويسلطكم وانتوا فالاخير الخصرانين تخصروا بعض وتصيروا مهزئة بين الناس يعني هيه الكسرات تأكلكم عيش بعدين الكلام يلصق بإسمك طول العمر اللي مو زين مو زين والزبط زبط وخلي الناس تقول الله يرحمو كان مؤدب وطيب بدل ما تقول فلان يوووه كان زفر
حتى عيالك بعدك تنفر من كلامك الزفر لما يقولوهم ابوكم قال وعمل 
فجأة وسمعوا صوت واحد يضحك ورا عند الحريم ولا هوه سعد ويقول انا ما عندي عيال مو زي ابو نفرين بس وقامت الغشنه فالخبت
ابو بشير قال لابو شرف الصبح على ينبع ياسيدي يهديك يرضيك حلف بالطلاق الا ينبع وفعلا رجعوا وسعد ومسعد اخذوا كم يوم زي البس والفار اللي ففلم كرتون توم اند جيري 
جلسوا كم يوم ولا سيارتين محملة من المدينه هذولاك بعوايلهم على بيت ابو بشير وي (كلاحه) وتلامه وغتاته قالوا قبل الاجازه تخلص نبغى نتنزه عندكم وحشتنا الصياديه والبحر والسمك حقكم طعم مرررره سعد مسح جسم الولد هذاك اللي يسب بشعر الجن اللي يجي فالثلاجه الخربانه زي الاسنفج بس الواد قام يحكحك وينقز ويتلوى الحقني يابويا الحقيني يااممممممي (الخرثع) يعني النمل يتكتكني 
ولما راحوا البحر حط لو (حماط) فرقبته وخلاه يدعس على 
(هلمان) بس مسعد طبق سعد فالبحر بغى يكتلو والسبب الكسرات خلاه يقول شلله شلله يا أمي

ـــــــــــــــــــــــــــــــــــــ

الحلقة 7 وتلاتين 
ـــــــــــــــــــــــــــــــــ

ماشاء الله تخرج سعود من معهد المعلمين وزن على اختو الا يبغى دباب وزنت اختو على ابو بشير قالها الدباب خطر شفتي كيف فلان وفلان ماتوا الله يرحمهم لكن الزن والرومانسيه والغنج يفلوا الحديد
نقلوا للمدرسة السعوديه وجات ينبع مزيكة جميل قلدهم طاح فالصهريج
سعد قدم معروض شكوى للريس فمسعد كتبهوله سواق الوايت بس سعد ينقلو هذا نصه
ياريس ماطار طير وارتفع الا كما طار (صقع) ويمكن ط ... ع كيف حالك كيف حال ولدك الحلو هذاك سلام مدري سطام ياترد مسعد عني ولا وديني تشوفوا شي ما يعجبكم ساكتلو ساكتلو تحسبوني خايف ياخي طز فيك وفيه على تليكي ياريس ازرط للوظيفه كلها انا اولى لك منو اقضيلك ووديتلك الملوخيه هذاك اليوم للبيت وغسلتلك السيارة من البحر واناالحمد لله بخير ماني محتاج بلديتكم دي وتراني (((شايف وعارف كل شي وساكت))) لكن مين لاجات عن حوقها وذوقها عليا وعلى اعدائي يالله ياريس تبغى شي والسلام عليكم ورحمة الله وبركاتو
الريس من يوم ما قرا الجمله اللي بين الأقواس طاح من الكرسي وقال جيبوه هذا الخبل ارضوه عطوه اللي يبي افصلوا مسعد (السلب) بلهجتهم انقلوه وفعلا على طول نقلوا مسعد للمحكمه سواق اما سعد اتحاوطوه المافيا وجابو الاسطمبه حط اصباعك وابصم على اوراق ومخططات وكروكي وكل بصمه يعطوه 300 ريال ول اكثرمن راتبو وهذا زي شفاط النمل يبصم وياخد ولا يدري على شن والفلوس قامت تجري الله يعينك يابو بشير اشترى دباب لسعود وجاب سعد ومسعد والعايله كلها وصالحهم قال سعد والله بس عشان خاطركم ولا اشتريه الرمه دا واشتري قبيلته ايش عنده دا المنتف ضحك مسعد وقال شفت الحوش اللى جنب المستشفى حقي يا نتن قالو سعد ابغاك يارحيمي تنقلي عندك فالمحكمه حيابهم ابو بشير على الغدا مسعد قال لسعد اتفضل انت اول قالو لا (الكيس ما يتعدى العكم )
ابو بشير اشترى بسكليتات 22 لبشير وعلي وصالح ودندشوها تلبسيه ونور ودينمو وجرس وبوري واناتل وي بزران ينبع يتمنوا الرضا منهم وصاحبوهم (اعطيني لفه) صالح اللي يقرب بسكليتو (يع قطو)
الناس قامت تشتكي ابو بشير على سعود يسرع بالدباب وشايل (الصفايه) دوش البلد وجابلهم (الصمرقع) وكترت هيامته (يردف) سطام ولد الريس وراه احا ياعم سعود ماكنت عاقل 
جا مسعد يجري لأخوه ابو بشير هات (التبعيه) بسرعه اطلعلك مزرعه بإسمك بس اتناول الجماعه كدا مبلغ (هج) عليه ابو بشير واستغفر ربه وقال اللهم اغننا بحلالك عن حرامك (قال سعيد بن زيد : لقد سمعت الرسول عليه الصلاة والسلام يقول : من اغتصب قيد شبر من أرض طوقه يوم القيامة من سبع أراضين ) راح مسعد لسعد قالو هات التبعيه بسرعه اعطهالو وطمع سعد قال لمسعد ابغى اطلع تبعيه لمنصوره واعطيهالك ياخويا ومدري يطلعوا تبعيه لأمي وابويا وجدتي وجدي الله يرحمهم اهي (نوايه تسند الزير) 
يالطيف مسعد مدري شن صابه صار (مدردم) زي البوكيمون ودوه للشريفه شرف الله يرحمها ويغفرلها فالرابغي عند الخان حطت المصمار فالجمر كوتو وحجبته كانت حكيمه وتداوي سعد قاللو حسدونا الحسدا يارحيمي اهب عليهم ما يعطوا خير 
حسدوا الفتى إذ لم ينالوا سعيه
فالقوم أعداء له وخصوم
ابو بشير قاللهم اسمعوا ياعيال الظلم ظلمات يوم القيامه بلا حسدوكم بلا دروشه هذا اكل الحرام والرشاوي (والبلص) من تحت لتحت ريحتكم فاحت الله يفضحكم اهب انا منقص عليكم شي كيف تقبلوا تاكلو وتأكلوا عيالكم الحرام كيف اتدخلو بيتكم حرام هل امنتوا عقاب جبار السموات والارض قال سعد الحمد لله انا ما عندي عيال بعدين كيف مدير مسعد وكيف الريس وكيف كلهم ياخذوا واحنا تبغانا نتفرج الله غفور رحيم ياحبيبي ايش فهمك انت خليك المره اختي دي ام بشير (مفشقه) عليك

ـــــــــــــــــــــــــــــــــــــــــ

الحلقة 38 وتلاتين
ـــــــــــــــــــــــــــــــــ

قدم ابو بشير على بنك التنميه وشاف المخطط الي رسمو المهندز ياسلام نسخه كل عماير البلد زي بعض مدخل وفيه الخزان والدرج كل شقه 4 غرف مزلسين ومزلس حريم وغرفة نوم ومطبخ وحمامين وبلكونات يرمح فيها الخيل يابخت الغبار الحمامات والغرف والصاله والمنور والمطبخ صغار لا حوش يتنفسوا فيه الاطفال وينشروا الغسيل ولا تفكير للمستقبل ولا تخطيط سليم كلو بالبركه والعبره فالنهايه والبلدية مشخره على وزن مصخره
اخدها مقاول وجاب العمال المصاريه وهاتك يا طلبات وصدوره وكذب ومطوحه وتأخير وشرده وبخشيش وفطور وغدا 
حطوا حديد واسمنت فالقواعد والاعمده والكمرات والسطح يكفي برج التجاره العالمي ولما تخلص العماره المونه والحديد الباقي تسويلها عماره تانيه قد عمارة لا اله الا الله
وقام جخ المصاريه بص سعادتكم دي غرفة النوم لونها وردي مع الوناسه الحمرا حتخليك عريس ابو بشير افتكر البكم والروشان وحمار جارهم وبص ياباشا الصاله حتكون باللون الازرق والمجلس بالاصفر وغرفة الطعام ابيض والمطبخ اسود والحمام احمر والمدخل اخضر ول دي حاقه تزغلل ياجدع وتجيب الصنج والطرم والاكتتاب 
ياالله البنيان يدوش والعمال يجيبوا الضغط والمقاول بعبع برويطه وبرنيطه وزنبيل وبرواز وقماطات والبياره لازم تأمين تدفع للبنك وراح على المسلمين مئات الالاف اكلوها حرام وشغلوها فوايد 
استأجر ابو بشير بيت ونقل فيه الين تغلق العماره وباع الدجاج خلاص مافي بيض بلدي ياعمي الخارجي احسن لاكوكو ولا كوكتلو 
وسعد اخد الغنم عنده وباع (الزوز) والجدوع والطيق والروشان والدلب والطيق بس اتصدقوا عاد لما جا الدركتن وهد بيته القديم راح اتفرج وحس بمغص وقلبو اتقطع واخد اسبوع معاه امساك واسبوع جالو اسهال وصخن وداخ ياعمي العشره ماتهون الا على بن الحرام هذا البيت اتولد واتربى وعاش فيه على المره والحلوه والزكريات والالام والدموع والفرح والسرور والجيره الحلوة وريحة الحبايب والألم والأمل والفرح والدموع
ياحبيبي ازكر الماضي الجميل 
يوم كنا بين هاتيك النخيل 
عواد محسن الله يرحمو سجل سطام ولد الريس وسعود فنادي الميناء ولعبوا مباراه فملعب السلاح فالمظلات جنب المطار انبرش سعود على الكوره الكفر (انصلت) الكديسه يعني انفصخت شاتها ظفر جات فالقده وارتدت علي بطنو كتمتو سطام ولد الريس جاتو الكوره شاتها عنص منص جات قون وتعال شوف اللعيبه يسلموا والجمهور يسلم فرصه حتى جمهور المجد يسلم وكلهم اتمنوا ان سطام يشارك في بطولة السباحه مدري ليش 
واتهاوش سعد مع عم (قمعه) الله يرحمه

ــــــــــــــــــــــــــــــــــ

الحلقة 9 وتلاتين
ـــــــــــــــــــــــــــــــــ

غلقت الاجازة وبدأت الدراسة فالمدرسة السعوديه بشير وعلي وصالح 
وكفاح ولد المدرس الفلسطيني ونضال ولد المساح اسماعيل وتيسير ولد الأردنى الصوالحه وتاج السر ولد السودانى عصمان الدكتور فالهلال كلهم الصباح راحوا مع بعض وريحة الأكل قايله شي فالشنطه 
( النصه) كل واحد ومقدرته (لبه) ودقه وصكر وسمن وبيض وحلاوه طحنيه وزعتر وبعد الفسحه تبدأ الغازات (شيط ميط) اف 16 
بشير وعلي وصالح قعدوا على (تخته) وحده صالح سوى مشكله وقام (يعنفص) إلا يبغى يقعد جنب الباب مايبغى فالنص جا الاستاذ ومحطو فظهره بالخيزرانه خلاه (يت لولو)
كل بعد فتره يجمعوا منهم (ريال فلسطين) ابو بشير يدفع عن ولده وعن صالح وعن علي وكل عيال البلد يدفعوا الله يعلم بعضهم ما عندهم و كفاح ونضال وتيسير ماعمرهم دفعوا قرش 
ابو بشير وابو شرف سافروا الشام للتجاره وعزمهم التاجر الكبير حسين الدمشقي واكرمهم عزم معاهم اخوانه ناس اباضايات وفتوه وذوق وشيخ البلد عبد الودود يظهر الورع والتقى والتدين وكمان القاضي عبد الجليل والفنان صباح فخري
منصوره وهيه قاعدة (تصبن) داخت ونفسها (غمت) عليها بس قامت ام بشير 
(نشقتها) و (بخرتها) بفصوخه وصرافه وشحمة ماعز قالت نوال يابنت لا تكوني حبلى سعد سمعها وفرح وقام اتوضا وصلى ركعتين شكر لله جاء مسعد يدور سعد قالوا له قاعد يصلي دخل عليه وفجأة (زرطلو) مسعد وطاح على ظهره من الضحك ودف سعد ولسعو بكف اشبك ياد انت قاللو ياهدر الرجال ما يلبس (شرشف) للصلاه قال سعد روح يا رمه ايش دراك مالك شغل وقام كبر ورجع يصلي قال مسعد انت حر بس فيه مزرعه ورا المجاهدين ولساع ما كمل كلامه الا سعد سلم قبل ما يركع وقاللو مشينا 
رجع ابو بشير من الشام محمل بالهدايا اقمشه وبقلاوه وفواكه بعد العصر راح الدكان وقال لحمدان اسمعني زين انا عمك ابغاك تفتح محل كبير نبيع فيه اقمشه وملابس اخترلنا موقع واستأجره قاللو حمدان والله ياعم سمعت انهم يبغوا يهدوا السوق قاللو ابو بشير بالمره دور موقع ممتاز واستأجره نسوي فيه دكان كبير وفرن قللو حمدان ايش رأيك ياعم فالحوش حق عم مسعد اللي ورا المستشفى 
ابو بشير كلم اخوه مسعد قام يتمغط ويتشرط قالتلو نوال استحي على وجهك اخوك مسكنا ببلاش ويصرف علينا وانت (تنعفص) معاه قاللها ياحبيبتي هذا شغل (بس نز) والتجاره شطاره فاهمه ياحماره

ـــــــــــــــــــــــــــــــــــــ

الحلقه اربعين نهاية الززء الاولاني
قصيدتي جازان ولستُ اجهلها 
ـــــــــــــــــــــــــــــــــ

قصيدةٌ بالفل خُطت بشرياني
أنت نجواي أنت ليلي وفجري أنت حرفي المضئ أنت كتابي
جيزان معناه العبور او التجاوز ربما لأنها من القدم همزة وصل بين الحجاز واليمن واسمها زمان المخلاف السليماني اهل جيزان ما (يشنو) احد بل العكس يحبو كل الناس 
سافر ابو شرف وابو بشير عند صديقهم رئيس البلدية الأديب السنوسي واكرموهم اهل جيزان الفيفي والعريشي والمعافا والحكمي والعلاقي والفرساني وغيرهم ابو بشير (مصدوم) يعني مزكم قال صاحبهم ياولد (هبلي) ليمون شكلك (مصفري ) يعني جيعان اخذهم المزرعة اتجمعوا على (الصحفه) واتغدوا قال لهم (تشتوا) جولة وداهم صبيا وابو عريش وصامطه وفيفا وجبالها والريث والجبل الأسود وبغازي ومتجد وغيرها سبحان الله طبيعة خلابة وخضرة تسر الناظرين وفيها العيون الحارة الوغرة ووادي ضمد والخوبه وهيه علاج مفيد وذاقوا المنقا والعنب والتفاح والسفرجل والرمان والليمون والبرتقال والقمح والشعير والذرة البيضاء ماشاء الله اودية كثيرة فجيزان ولما الامطار تصب تتجمع كلها فمنطقه ابو شرف قال لهم ان شاء الله يسووا لكم سد الدوله وشافوا الطفي الدوم وعملية العطين وهي تعريض الحب للشمس والصريب نزع السنبله عن القصب والخبيط وهو فصل الحب عن السنبله الجرة والشاطرة والرجبية وهي أوانٍ فخارية تستخدم لحفظ وتبريد المياه 
وراحو جزر فرسان بالسنبوك وشافوا أشجار الشورا شديدة الاخضرارالوديان التي يشاهد فيها أسراب الغزلان والشعاب المرجانية المتناثرة وعاشوا أمسيات السمر والسهر على أنغام السمسمية والدانة والكسرة وسط أمواج البحر العاتية وضوء القمر الساطع ولما قرب ريس السنبوك من الساحل هزج الجميع بعد أن مدوا الشراع قالو
مدو اشراع أبو ريشة يا مولاي.. لا خير في شب كسلان
يا مولاي.. يشقى وله الطرف نعسان يا مولاي.. يا ربنا لا تعيقه
يا مولاي واجعل محمد رفيقه يا مولاي.. ويسره بالسلامة
والسلامة غنيمة.. والعافية نعمة الله والخير كله من الله
ختمت بالوحداني يا فرد ما له ثاني.. يا مولاي
عزمهم صاحبهم العلاقي لزواج ولده (محمد) وشافوا العشة وفيها أربع مقايد أو كراسي خشبية مع مغزل كرسي خشبي صغير يسمى(الغزالي أو المغزل ) تجلس عليه ربة البيت ويردد الأطفال وهم يستمتعون بمشاهدة بناء العشة بعض الأهازيج الشعبية الجميلة مع الشخص الذي يقوم بالبناء وهم في غاية السعادة والفرح ببناء المنزل الجديد 
عشتي يا عشتي إبني لي قشتي. لفرشتي ومخدتي عشتي ياعشتي. 
ووروهم (المشلاف) اللي هو مكون من عدة عناصر ومواد نباتية معطرة مثل الفل البلدي الأبيض والكاذي والوالة وفل عزان الأصفر والبقيران وغيرها من أنواع النباتات العطرية التي تشتهر بها المنطقة وتتم زراعتها في المدرجات والسفوح الخضراء بجبال فيفا وبني مالك والكادي الذي يعتبر بحق سيد النباتات العطرية نظراً لحجمه الكبير ورائحته القوية النفاذة التي تعبق في الأجواء وتعطر أمسيات الفرح الجميلة وتضفي على العروس منظراً جميلاً ورائعاً وحلة قشيبة من أنواع الزينة النسائية وما أحلى منظر البنات الصغار من قريبات العروس والعريس وهن يتمخطرن في (الميل) حاطين فوق رؤوسهن مشلاف الكاذي والفل مقلدات العروسة وسط اطلاق (الغطارف) القوية والأهازيج الشعبية النسائية ومنها 
سلم واستلم محمد صاحب القلم وعروس ديري أمحننة 
عروس مالك منة عروس وهو اللا جاهل/ وهي اللا جاهلة 
(محمد) من سباعته (محمد) عد بشقننه 
كناية الى مركز العريس وكرمه الحاتمي وبخاصة في مجال عمله وكسبه من عرق جبينه وعمل يده وعلقوا اللمبات والزينة وعقود الكهرباء مع عقود الفل والكاذي وعلى واجهات المنازل وفي يوم (المقيل) المخصص للاحتفاء بالعروسة في منزل أهلها يبدأ الاستعداد بدري وتجي (المقينة) أو (المزينه) واعطوها فلوس وحطت الخلطه السريه مادة الطيّب المكونه من المحلب والزر والقرنفل والعصيل والعفص والجوزة وغيرها من انواع النباتات العطرية 
وخلصت من الطبقه الاولى (الغطية) بعدين الطبقة الثانية وغنوا
العروس قبلن تنفخ الأزباد لا صلع حجلها جاونبه الجبال 
العروس قبلّن تنضح الا بعود لا صكع حجلها جادبنه الفرود 
وغنوا كمان 
حلفت يا الليلة يا جهر ما ترقد لمان (يقاقي) الديك ويصكع الملكد 
حلفت يا صر ما اروح وتطلع النجمة والصبح قد ضوّح 
بعدين جات (المخضبه) او(النقاشة) وحطت الحناء والعفص الأسود و الحطم الأسود والشب الأبيض و(مززته) بالليمون والتمر الهندي وترسم اشكال هندسية وفنية جميلة على كف العروس وقدميها وساقيها 
رجعوا من جيزان مرررره مبسوطين وممنونين من الكرم والجود والشهامة والرجولة وعزموهم ابو بشير لينبع وابو شرف لمكة